पिसुर्ले: सत्तरी तालुक्याच्या दौ-यावर आलेले आम आदमी पक्षाचे सर्वेसर्वा तथा दिल्लीचे मुख्यमंत्री अरविंद केजरीवाल (Chief Minister Arvind Kejriwal) यांनी परीतीचा प्रवास करताना होंडा, कुडणे व हरवळे सीमेवर असलेले प्रसिद्ध श्री आजोबा देवस्थानाला दुपारी एक वाजता भेट देऊन दर्शन घेतले. राज्यात आम आदमी पक्षाचे कार्यकर्त्यांना मार्गदर्शन करण्यासाठी दोन दिवस गोव्यात आलेले दिल्लीचे मुख्यमंत्री अरविंद केजरीवाल हे आज वाळपई मतदार संघात येणाऱ्या बुद्रुक व पर्ये मतदार संघात येणाऱ्या म्हाऊस येथे भेट देऊन नागरिकांना संबोधित केले. त्यानंतर पुढच्या प्रवासाला निघताना त्यांनी होंडा येथिल प्रसिद्ध अशा श्री आजोबा मंदिराला भेट देऊन दर्शन घेतले.

यावेळी त्यांच्या सोबत काल आम आदमी पक्षात प्रवेश केलेले गोवा माईनिग पीपल्स फ्रंटचे प्रमुख पुती गावकर, आप पक्षाचे राज्य समन्वयक राहूल म्हाबंरे, शुभम शिवोलकर, पुंडलिक माडकर आदी उपस्थित होते. यावेळी मात्र दिल्ली येथे जाऊन आम आदमी पक्षात प्रवेश केलेले पर्ये मतदार संघातील भाजपाचे माजी पदाधिकारी अॅड गणपत गावकर हे खुद्द पर्ये मतदारसंघातील असुन सुद्धा त्यांची उपस्थिती दिसली नाही, सदर भेट देतेवेळी त्यांच्या सोबत ॲड गणपत गावकर हे उपस्थित असतील असे अपेक्षित होते. यावेळी पक्षाचे कार्यकर्ते पुंडलिक माडकर यांनी अरविंद केजरीवाल यांना पुष्पगुच्छ देऊन त्यांचे स्वागत केले.