पणजी : भाजपने पर्रीकरांच्या कुटुंबासोबत जे केलंय त्यामुळे गोव्यातील जनता अस्वस्थ झाली आहे. भाजपची 'यूज अँड थ्रो' पॉलिसी पर्रीकरांच्या कुटुंबासोबत वापरलं जाणं दुर्दैवी आहे. आम्ही मनोहर पर्रीकरांचा आदर करतो, उत्पल पर्रीकरांना जर आपमध्ये यायचं असेल तर त्यांचं स्वागतच आहे, अशा शब्दात आपचे सर्वेसर्वा आणि दिल्लीचे मुख्यमंत्री अरविंद केजरीवाल यांनी खुली ऑफर दिली आहे. (Arvind kejriwal on Utpal Parrikar News Updates)

उत्पल पर्रीकरांना जर पणजीतून आपच्या तिकीटावर निवडणूक लढवायची असेल तर त्यांचं आम्ही स्वागतच करतो, अशा शब्दात अरविंद केजरीवालांनी (Arvind Kejriwal) उत्पल यांना आपमध्ये येण्याचं आमंत्रणच दिलं आहे. उत्पल पर्रीकरांना भाजपने आपल्या 34 उमेदवारांच्या यादीत स्थान न दिल्याने केजरीवालांनी भाजपवर सडकून टीका केली आहे. भाजपने आपली 'यूज अँड थ्रो' पॉलिसी मनोहर पर्रीकरांच्या (Manohar Parrikar) कुटुंबीयांसोबतही वापरल्याचा निशाणाही त्यांनी साधला आहे.

दरम्यान भाजपकडून उत्पल पर्रीकरांना (Utpal Parrikar) पणजीऐवजी डिचोली मतदारसंघातून निवडणुकीचं तिकीट देण्याची तयारी दर्शवली आहे. मात्र भाजपची ही ऑफर उत्पल पर्रीकरांनी धुडकावून लावली आहे. डिचोलीतून निवडणूक लढवण्याची आपली इच्छा नाही, त्यामुळे डिचोलीच्या जागेचा प्रश्नच उद्धवत नाही. पणजीतूनच निवडणूक लढवण्यावर आपण ठाम असल्याचं उत्पल पर्रीकरांनी स्पष्ट केलं आहे. तसेच आपल्याकडे उपलब्ध पर्यायांबाबत विचार सुरु असून लवकरच निर्णय जाहीर करणार असल्याचंही त्यांनी स्पष्ट केलं आहे.