Vande Bharat Express: मंगळुरू ते मडगाव या रेलमार्गावर उद्या शनिवार 30 डिसेंबरपासून मंगळुरू ते मडगाव व परत ‘वंदे भारत एक्स्प्रेस रेल्वे’ सुरू होत आहे. सकाळी मंगळुरू स्टेशनवरून पंतप्रधान नरेंद्र मोदी या गाडीसह इतर पाच रेलमार्गांवरील ‘वंदे भारत एक्स्प्रेस’ला हिरवा झेंडा दाखवणार आहेत.

संध्याकाळी 3.30 वाजता ही गाडी मडगाव स्थानकावर पोहोचणार असून मुख्यमंत्री डॉ. प्रमोद सावंत व आमदार दिगंबर कामत हे मडगाव स्थानकावर या गाडीचे स्वागत करणार आहेत. पंतप्रधान नरेंद्र मोदी यांच्या हस्ते उद्या श्री माता वैष्णादेवी कटरा ते नवी दिल्ली, अमृतसर ते दिल्ली, कोईम्बतूर ते बंगळुरू, जालना ते मुंबई, अयोध्या ते आनंद विहार टर्मिनल या मार्गावरील ‘वंदे भारत एक्स्प्रेस’नाही हिरवा झेंडा दाखवणार आहेत.

शिवाय पंतप्रधान दोन अमृत भारत रेल्वेचेही उद्‍घाटन करणार आहेत. जूनपासून मडगाव ते मुंबई ही ‘वंदे भारत एक्स्प्रेस’ सुरू करण्यात आली होती. मडगाव स्थानकावरून धावणारी ही दुसरी वंदे भारत एक्स्प्रेस असेल.

जेव्हा ही गाडी नियमीत सुरू होईल तेव्हा मंगळुरूहून सकाळी 8.30 वाजता सुटेल व मडगावला 1.05 वाजता पोहोचेल. मडगावहून ही गाडी संध्याकाळी 6.10 वाजता सुटेल व मंगळुरूला रात्री 10.45 वाजता पोहोचेल. ही गाडी उडुपी व कारवार स्थानकांवर थांबेल, असे सांगण्यात आले आहे.

प्रवासाची वेळ होणार कमी

गोव्यात यावर्षी जून महिन्यात मडगाव ते मुंबई मार्गावर धावणारी पहिली वंदे भारत गाडी सुरू करण्यात आली होती. आता कोकण रेल्वे मार्गावर धावणारी गोव्यासाठी दुसरी मडगाव जंक्शन ते मंगळुरू या मार्गावर सेमी हायस्पीड वंदे भारत गाडी धावणार आहे.

30 डिसेंबरपासून या सेवेस सुरवात होणार आहे. वंदे भारत एक्स्प्रेस सेवेच्या प्रारंभामुळे मंगळुरू आणि मडगाव दरम्यानचा प्रवास वेळ लक्षणीयरीत्या कमी होईल, ज्यामुळे या दोन्ही प्रदेशातील पर्यटन आणि व्यवसायाच्या संधींना चालना मिळणार आहे.