मडगाव : दक्षता खात्याने सुरू केलेली चौकशी प्रलंबित आहे असे कारण पुढे करून उपमुख्यमंत्री बाबू कवळेकर यांचे पूर्वीचे स्वीय सहाय्यक अर्जुन वेळीप यांनी आपल्या सरकारी नोकरीचा दिलेला राजीनामा न स्वीकारण्याचा सरकारी निर्णयाला वेळीप यांनी मुंबई उच्च न्यायालयात आव्हान दिले असून या आव्हान अर्जावर 7 जानेवारी रोजी निवाडा होण्याची शक्यता व्यक्त केली जात आहे.

वेळीप यांनी यावेळी उपमुख्यमंत्री बाबू कवळेकर यांच्या विरोधात केपे मतदारसंघातून निवडणूक लढविण्याचा आपला इरादा यापूर्वीच स्पष्ट केला आहे. त्यासाठी त्यांनी दिलेला सरकारी नोकरीचा राजीनामा सरकारने स्वीकारणे आवश्यक आहे.

मागच्या आठवड्यात हा अर्ज सुनावणीस आला असता एडव्होकेट जनरल देविदास पांगम यांनी राज्याची बाजू मांडण्यासाठी आणखी वेळ मागून घेतल्याने ही सुनावणी तहकूब करण्यात आली होती. आपल्यावर जरी चौकशी सुरू करण्यात आली असली तरी आपल्यावरील आरोपात काहीच तथ्य न सापडल्याने दक्षता खात्याने ही चौकशी बंद केली होती. आपल्या विरुद्ध दाखल केलेली तक्रार राजकीय हेतूने प्रेरित होती असा दावा वेळीप यांनी उच्च न्यायालयात (High Court) केला असून त्यामुळे आपला राजीनामा सरकारला स्वीकारण्यास भाग पाडावे अशी मागणी केली आहे.

वेळीप हे सध्या बाणावली पंचायतीचे सचिव असून फातर्पा पंचायतीत ते सचिव (Secretary) म्हणून असताना त्यांनी निधीचा गैरवापर केला, अशा आशयाची तक्रार फातर्पाचे तत्कालीन सरपंच (Sarpanch) सेंझिल डिकॉस्ता यांनी दाखल केली होती. याच प्रकरणी वेळीप यांच्या विरोधात दक्षता खात्याने चौकशी सुरू केली होती. मात्र मागची कित्येक वर्षे ती शितपेटीत पडली होती.

आता आपण उपमुख्यमंत्री कवळेकर यांच्या विरुद्ध निवडणूक (Election) लढवू पाहत असल्याने हे बंद झालेले प्रकरण मुद्दामहून पुन्हा उकरून काढले आहे असा वेळीप यांचा दावा आहे. वेळीप हे तृणमूल (Trinamool) पक्षात सामील होण्याची शक्यता व्यक्त केली जात आहे.