पणजी: हरमल येथील राजरोसपणे सुरू असलेल्या वेश्याव्यवसायाविरुद्ध स्थानिक लोक संतप्त झाले आहेत. आम्ही आमचे रक्षण करण्यास समर्थ आहोत, असा पवित्रा घेत स्थानिकांनी पोलिसांना सोमवारपर्यंतचा ‘अल्टिमेटम’ दिला आहे. मात्र, या संपूर्ण प्रकरणात प्रबळ विरोधातील एकही पक्षांच्या नेत्यांनी याबाबत स्थानिकांकडे साधी विचारणाही केली नसल्याचे माजी सरपंच डॅनियल डिसोजा यांनी स्पष्ट केले. एकंदरीत, हे मौन आता संशयाच्या भोवऱ्यात सापडले आहे.

स्थानिकांनी पीडित महिलांचे कॉल रेकॉर्ड्स तपासण्याची आग्रही मागणी केली आहे. या एका मागणीमुळे पोलिस प्रशासनाची झोप उडाली आहे. डॅनियल डिसोझा यांनी दिलेल्या माहितीनुसार, हरमलमध्ये स्पा सेंटर्स सुरू राहणे आणि पोलिसांच्या वारंवार होणाऱ्या बदल्या, हा निव्वळ योगायोग नसून यामागे एखादी ''अदृश्य शक्ती'' चा हात आहे.

येत्या सोमवारपर्यंत ठोस कारवाई न झाल्यास हरमलमध्ये जनआंदोलन करण्याची आमची तयारी आहे. हे आंदोलन केवळ पोलिसांविरुद्ध नसेल, तर त्या निष्क्रिय प्रशासनाविरोधात असेल.

चार दिवस झाले, पण एकाही नेत्याने आमची साधी विचारपूसही केली नाही. आम्ही आता कोणाचीही वाट न पाहता रस्त्यावर उतरण्याच्या तयारीत आहे. पण, जे स्वतःला जनतेचे कैवारी म्हणतात, त्यांचे दर्शन न होणे हे खटकणारे आहे.

- जोकीम फर्नांडिस, स्थानिक

पत्रकारांना सर्व माहिती मिळते, तर पोलिसांना ती का मिळत नाही? आम्ही पोलिसांना पूर्ण सहकार्य करायला तयार आहोत, पण राजकीय पाठबळ नसल्याने कारवाई संथ आहे की काय, अशी भीती वाटते. सोमवारी आमची पुढील रणनीती ठरेल.

- डॅनियल डिसोझा, माजी सरपंच