म्हापसा: काणका-बार्देश येथील श्री साई सेवाधाम विश्वस्त मंडळातर्फे श्रीसाईबाबांच्या मूर्ती प्रतिष्ठापनेचा एकोणिसावा वर्धापनदिन सोहळा तसेच द्वारकमाई मंदिरातील श्रीगणेशमूर्ती प्रतिष्ठापनेचा सतरावा वर्धापनदिन व श्री रामनवमी उत्सव अशा विविध कार्यक्रमांना 8 रोजी प्रारंभ होणार आहे.

8 ते 10 एप्रिलपर्यंत दररोज पहाटे 5.15 वाजता काकड आरती, इतर धार्मिक विधी होतील. उत्सवमूर्तीस स्वहस्ते अभिषेक करण्याची सोय करण्यात आली आहे.8 रोजी सकाळी परेश पालयेकर यांच्या यजमानपदाखाली पंचायतन यागास प्रारंभ होईल. दुपारी 12.30 वाजता माध्यान्ह आरती, तीर्थप्रसाद, सायंकाळी 7.30 वाजता धुपारती व तीर्थप्रसाद, तर रात्री 10 वाजता शेजारती होईल.

9 रोजी वर्धापनदिनानिमित्त गृहस्थापना, मुख्य देवता हवन, बलिदान, पूर्णाहुती, सकाळी 9 वाजता यजमान वासुदेव कोरगावकर यांच्यातर्फे गणपती मंदिर अभिषेक, सकाळी 10 वाजता एकवीस दाम्पत्यांतर्फे श्री साई सत्यनारायण पूजा, दुपारी 12.30 वाजता माध्यान्ह आरती व तीर्थप्रसाद, दुपारी 1 वाजता महाप्रसाद, सायंकाळी 7 वाजता साई पालखी मंदिर प्रदक्षिणा व महिलांतर्फे दीपोत्सव, सायंकाळी 7.30 वाजता धुपारती व तीर्थप्रसाद, रात्री 8 वाजता तेंडोली येथील श्री बावळेश्वर दशावतार नाट्यमंडळातर्फे ‘मोक्षदायिनी’ हा पौराणिक नाट्यप्रयोग, तर रात्री 10 वाजता शेजारती होईल.

10 रोजी रामनवमीनिमित्त दुपारी 12 वाजता रामजन्म सोहळा, आरती व तीर्थप्रसाद, सायंकाळी 7 वा. दहीहंडी फोडण्याचा विधी, तदनंतर साई पालखी मंदिर प्रदक्षिणा, सायंकाळी 7.30 वाजता धुपारती व तीर्थप्रसाद, रात्री 8 वाजता भजन, तर रात्री 10 वाजता शेजारती होऊन उत्सवाची सांगता होईल.