म्हापसा: तीन माड, मयडे -बार्देश येथील श्री राष्ट्रोळी प्रमुख पंचायत देवस्थानचा अठरावा वर्धापनदिन सोहळा सोमवारी 7 मार्चपासून साजरा होत आहे. यानिमित्त मंदिरात सग्रह पंचायतन याग व रुद्रयाग अनुष्ठान सोहळा होईल.

यानिमित्तचे सर्व धार्मिक विधी पुरोहित गिरिधर वाटवे यांच्या अधिपत्याखाली आणि मानकरी महाजन अंबिका सुर्लीकर व अनिता भरत आसोलकर (धुरी) यांच्या यजमानपदाखाली होणार आहेत.

सोमवारी 7 ते गुरुवारी 10 मार्च या दरम्यान दररोज सकाळी 8 वाजता श्रीगणेशपूजन, पुण्याहवचन, प्राकारशुद्धी, लघुरुद्र, अभिषेक, गृहशांती, पंचायतन याग, देवता प्रतिष्ठापना, होमहवन, बलिदान, पूर्णाहुती, आरती, मंत्रपुष्प सामुदायिक प्रार्थना, तीर्थप्रसाद व महापसाद होणार आहे. 7 रोजी संध्याकाळी 7 वाजता सुहासिनींतर्फे दीपोत्सव व त्यानंतर रात्री 8.30 वाजता ‘ब्रह्मास्त्र मोक्षप्राप्ती’ हा दशावतारी नाट्यप्रयोग होईल.

8 रोजी सकाळी श्रींस महाभिषेक व दुपारी 4 वाजता दामिनी विठू सुर्लीकर यांच्‍या यजमानपदाखाली सत्यनारायण महापूजा होईल. रात्री 8 वाजता ‘करीन ती पूर्व’ हा नाट्यप्रयोग होईल. 9 रोजी सायंकाळी 4 वाजता मीना मधुकर बेळेकर यांच्या यजमानपदाखाली सत्यनारायण महापूजा, तर रात्री 8 वाजता ‘अक्कलशून्य’ हा नाट्यप्रयोग होईल. 10 रोजी सायंकाळी 7 वाजता देणगी कूपनांचा निकाल जाहीर केल्यानंतर आगामी पूजेच्या मानकऱ्यांची निवड होईल. रात्री 8.30 वाजता स्थानिक कलाकारांतर्फे भजनाचा कार्यक्रम होणार आहे.