इन्स्टाग्रामवर महिलेचे अश्लिल फोटो पाठवून तिच्याकडे लैंगिक सुखाची मागणी करणाऱ्या एका संशयित युवकाला हणजुणे पोलिसांनी अटक केली आहे. संशयित युवक हा म्हापसा येथील असून त्याला न्यायालयाने 4 दिवसांची कोठडी सुनावली आहे.

हणजुण पोलिसांनी दिलेल्या माहितीनुसार, हणजुण येथे राहणाऱ्या एका महिलेला संशयिताने तिचे अश्लिल फोटो इन्स्टाग्रामवर पाठवले आणि लैंगिक सुखाची मागणी केली. तसे न केल्यास गंभीर परिणाम भोगावे लागतील अशी धमकी दिली. महिलेने संशयिताविरोधात हणजुण पोलिस स्थानकात तक्रार दिली.

तक्रारीच्या आधारे एसडीपीओ म्हापसा जिवबा दळवी यांच्या नेतृत्वाखाली एक पथक तयार करण्यात आले व संशयिताच्या घरावर छापा टाकण्यात आला. यावेळी संशयिताचा लॅपटॉप व मोबाईल जप्त करण्यात आला. संशयित हा तक्रारदाराचा जुना मित्र असल्याचे तपासात उघड झाले.

कुणाल मयेकर (21, रा. म्हापसा) असे अटक करण्यात आलेल्या संशयिताचे नाव असून त्याला न्यायालयाने 4 दिवसांची कोठडी सुनावली आहे.  पुढील तपास उत्तर गोवा जिल्ह्याचे पोलील अधीक्षक निधीन वाल्सन, म्हापसाचे एसडीपीओ जिवबा दळवी आणि पीआय प्रशाल देसाई यांच्या देखरेखीखाली सुरू आहे.