National Women's Football गोव्याच्या महिलांनी मागील पराभवातून सावरताना 27 व्या राष्ट्रीय सीनियर महिला फुटबॉल स्पर्धेत शुक्रवारी विजयाची नोंद केली. गट तीनमधील लढतीत कॅरेन एस्ट्रोसियो व सुश्मिता जाधव यांच्या शानदार कामगिरीच्या बळावर यजमान संघाने आंध्र प्रदेशचा 9-0 फरकाने धुव्वा उडविला.

फातोर्डा येथील पंडित जवाहरलाल नेहरू स्टेडियमवर झालेल्या आणखी एका लढतीत हिमाचल प्रदेशने राजस्थानवर 15-0 असा प्रचंड फरकाने विजय प्राप्त केला. त्यांच्यासाठी पूनम हिने पाच, निशा हिने चार, मनीषाने तीन, अंजू हिने दोन, तर नकेता हिने एक गोल केला.

गोव्याच्या विजयात कॅरेन एस्ट्रोसियो व सुश्मिता जाधव यांनी चमकदार खेळ केला. कॅरेन हिने पाच, सुश्मिताने तीन गोल केले. अन्य एक गोल नमिता गोवेकर हिने नोंदविला. विश्रांतीला गोव्याचा संघ 6-0 फरकाने आघाडीवर होता.

सुश्मिताने अनुक्रमे सहाव्या, 17 व्या व 52 व्या मिनिटास गोल नोंदविला. कॅरेनने धडाकेबाज खेळ करताना 10 व्या, 22 व्या, 32 व्या, 49व्या व 55 व्या मिनिटास अचूक नेमबाजी साधली. नमिताने 39व्या मिनिटास गोलची नोंद केली.

गटातील ताजी स्थिती

स्पर्धेच्या गट तीनमध्ये ओडिशा व हिमाच प्रदेशने प्रत्येकी तीन सामने खेळल्यानंतर दोन विजय व एका बरोबरीसह समान सात गुण नोंदविले आहेत. दोन विजय व एका पराभवामुळे गोव्याचे सहा गुण आहेत. एक विजय व दोन पराभवामुळे आंध्र प्रदेशच्या खाती तीन गुण असून राजस्थानला चारही लढतीत पराभव स्वीकारावा लागला आहे.