Amthane Dam Water Level

डिचोली: उत्तर गोव्याची तहान भागवणाऱ्या आमठाणे धरणातील जलसाठा कमालीचा घटला असून, सभोवतालचे पात्र कोरडे पडले आहे. आज मंगळवारी दुपारपर्यंत या धरणातील जलसाठा क्षमतेपेक्षा जवळपास ९ मीटरनी कमी झाल्याचे दिसून आले.

ऐन मार्च महिन्यात जलसाठा कमी झाल्याने चिंता व्यक्त होत आहे. जलसाठा नियंत्रित ठेवण्यासाठी आता साळ बंधाऱ्यातील पाण्यावर भिस्त अवलंबून आहे.

दरम्यान, महिन्यापूर्वी तिळारी कालव्याला भगदाड पडल्यानंतर गोव्याचा पाणीपुरवठा बंद झाला होता. त्यामुळे आमठाणे धरणावर ताण आला होता.

या समस्येवर मात करण्यासाठी या धरणातून नियमितपणे अस्नोडा जलशुद्धीकरण प्रकल्पाला पाणीपुरवठा करण्याची वेळ आली होती.

मेणकुरे-धुमासे पंचायत क्षेत्रात येणाऱ्या आमठाणे धरणाचे कार्यक्षेत्र ५८२ हेक्टर मीटर एवढे आहे. तर, पाण्याची पातळी ५२ मीटर एवढी आहे. गेल्या आठवड्यापर्यंत या धरणातील जलसाठ्याची पातळी जवळपास ७ मीटरनी घटली होती. तरीसुद्धा जनतेने काळजी करू नये असे आवाहन करण्‍यात आले आहे.

लोकांनी काळजी न करण्‍याचे आवाहन

आज सायंकाळपर्यंत या धरणातील जलसाठा ४३ मीटर एवढा खाली आला. धरणाच्या सभोवतालचे पात्र कोरडे पडले आहे. अलीकडच्या तीन ते चार वर्षांत ऐन मार्च महिन्यात धरण सभोवतालचे पात्र कोरडे पडले नव्हते. या धरणात साळ बंधाऱ्यातून अतिरिक्त पाणी सोडण्यात आल्यानंतर हळूहळू जलसाठा नियंत्रित करण्‍यात येणार आहे. पावसाळ्यापर्यंत पाणी नियंत्रित ठेवण्यात येणार असल्याने जनतेने काळजी करू नये, असे जलस्रोत खात्याने स्पष्ट केले आहे.