साखळी: ‘तेरी मॉं काम पे गयी है, पापाने तुझे लाने को कहा है’, असे म्हणून एका राखाडी रंगाच्या ‘इको’मधून आलेल्या चौघांनी आमोणा साखळी येथे सरकारी शाळेत शिकणाऱ्या १२ वर्षीय मुलाचे अपहरण करण्याचा प्रयत्न केला. मात्र मुलाच्या सतर्कतेमुळे हा डाव फसला.

मुलाने आपल्या वडिलांचे नाव काय ? असे अपहरणकर्त्यांना विचारले आणि पप्पाला फोन लावून विचारतो, असे म्हणत पाठीवरील बॅगमध्ये हात घातला. असे करताच अपहरणकर्त्यांनी गाडीचे दार बंद करून या रस्त्यावरून पळ काढला.

मुलाने अचूक टिपला गाडीचा नंबर

यावेळी या मुलाने गाडीचा क्रमांक टिपला. या गाडीचा क्रमांक एमएच नोंदणीकृत होता. क्रमांक पट्टीवरील मधली अक्षरे पिवळ्या रंगाने लपविण्यात आली होती, तर गाडीचा क्रमांक ९०६० असा असल्याचे या मुलाने टिपले होते.

ही माहिती पोलिसांना देण्यात आली आहे. ही इको कार आमोणाहून माशेलमार्गे गेल्याचा अंदाज आहे.