म्हापसा: आमोणा येथे एका बस अपघातात जखमी होऊन अपंगत्व आलेल्या विनय उर्फ विनायक भिकाजी सावंत (रा. आमोणा डिचोली) यांना ‘नो-फॉल्ट-दायित्व’ रक्कमेसह २४. ४६ लाख रुपये भरपाई रक्कम देण्याचा आदेश म्हापसा मोटार अपघात दावा न्यायाधिकरणाने (लवाद) बस चालक तथा मालक आणि विमा कंपनीला दिला.

या भरपाई दावा खटल्यात बस चालक तथा मालक व एका खासगी विमा कंपनीला प्रतिवादी बनवले होते.हा अपघात ३१ जुलै २०१३ रोजी, रात्री सावंतवाडा आमोणा येथील बस थांबाजवळ घडला होता. व्यवसायाने मासळी विक्रेते असलेले विनय सावंत हे सदर प्रवासी बसमधून माशेल ते आमोणा दरम्यान प्रवास करत होते.

घटनेच्यावेळी बस थांबाजवळ बस प्रतिवादी बस चालकाने उभी केली. त्याबरोबर दावेदाराने बसचा दरवाजा उघडला असता, बस चालकाने अचानक बस गाडी रिव्हर्समध्ये नेली. त्याबरोबर उघड्या दरवाज्यातून दावेदार खाली कोसळलेल्या व त्यांच्या पायावरून बसचे चाक गेले.

या बस खाली चिरडून दुखापत झालेल्या पायांवर गोमेकॉत शस्त्रक्रिया करण्यात आली.घटनेच्यावेळी दावेदार हे ४४ वर्षांचे होते व मासेविक्रीतून ते मासिक १५ हजार रुपये उत्पन्न मिळवायचे. या अपघातामुळे अपंगत्व आल्यामुळे आपणास नुकसान भरपाई मिळावी, म्हणून दावेदार सावंत यांनी मार्च २०१७मध्ये न्यायप्राधिकरणाकडे दावा याचिका दाखल केली.

६ टक्के व्याजासह भरपाई!

मार्च २०१७ पासून ६ टक्के वार्षिक व्याजासह २२ लाख ४६ हजार ५६० रुपये रक्कम नुकसान भरपाई दाव्याच्या स्वरूपात देण्याचा आदेश लवादाच्या पीठासीन अधिकारी यांनी दिला. प्रतिवादी विमा कंपनीने सदर रक्कम व्याजासह मोटार अपघात दावा न्यायाधिकरणाच्या म्हापसा स्टेट बँकेच्या चालू बँक खात्यात जमा करावी व न्यायाधिकरण तसेच दावेदाराला याची माहिती द्यावी, असे निर्देशही या निवाड्यात लवादाने दिलेत.