मडगाव : गोव्यात काँग्रेसची जागा आरजी पक्ष घेऊ पाहत असताना काँग्रेसच्या अध्यक्षपदी नवीन चेहरा आणून तरुणांना पक्षाकडे ओढण्याचे काँग्रेस ठरवले असून त्यासाठी अमित पाटकर किंवा कार्लोस फेरेरा यांच्याकडे प्रदेश अध्यक्षपदाची सूत्रे देण्याची शक्यता व्यक्त केली जात आहे. (Amit Patkar and Carlos Ferreira in the race for the presidency of the Pradesh Congress Committee)

गोव्यात (Goa) आलेल्या केंद्रीय निरीक्षक रजनी पाटील यांच्याशी काल मडगावात (Madgaon) झालेल्या चर्चेत हा प्रस्ताव पुढे आल्याचे कळते. संकल्प आमोणकर आणि कॅ. विरियातो फेर्नांडिस ही या शर्यतीत असलेली अन्य दोन नावे आहेत.

काल पाटील यांच्या बरोबर झालेल्या चर्चेत कॅ. फेर्नांडिस यांनी आपल्याला अध्यक्ष बनविण्या ऐवजी युवा नेते पाटकर यांच्याकडे ही सूत्रे घ्यावीत तसेच कार्लोस फेरेरा यांच्यावरही महत्वाची जबाबदारी द्यावी अशी मागणी केली. आपण स्वतः काँग्रेस समितीच्या कार्यात झोकून देऊन काम करण्याची तयारी कॅ. फेर्नांडिस यांनी यावेळी दाखवली.

दरम्यान काल रजनी पाटील यांच्यासमोर काँग्रेस मधील बेदिलीही उघड झाली. वेळ्ळी येथील काँग्रेस उमेदवार सावियो डिसिल्वा यांच्या समर्थकांनी पक्षातील जबाबदार प्रतिनिधींनी विरोधी काम केल्यामुळेच वेळ्ळीत काँग्रेसचा पराभव झाला असे आरोप करून काँग्रेसचे (Congress) दक्षिण गोवा अध्यक्ष ज्यो डायस याना यावेळी लक्ष्य केले.