Goa Mining: एका आठवड्याच्या आत काले रेल्वे स्थानक ते आडणे जेट्टीपर्यंत उर्वरित 2 हजार 25 मेट्रिक टन खनिज वाहतूक करण्यास मुंबई उच्च न्यायालयाने मंगळवारी परवानगी दिली. काले भागातील खनिजाची हाताळणी आणि वाहतूक याबाबत निर्णय घेण्यासाठी मुख्य वन्यजीव संरक्षकांना चार आठवड्याची मुदत देण्यात आली आहे.

उर्वरित 2,025 मेट्रिक टन खनिजाच्या व्यतिरिक्त काले रेल्वे स्थानकावर यापुढे कोणतेही खनिज हाताळणी आणि वाहतूक करू नये, असेही न्यायालयाने आदेशात नमूद केले आहे.

पुढे आदेशात म्हटले आहे की, यापुढे काले रेल्वे स्थानकावर स्वतंत्रपणे खनिजाची हाताळणी आणि वाहतूक करण्यासाठी कंपन्यांनी एका आठवड्याच्या आत मुख्य वन्यजीव संरक्षकांकडे अर्ज करता येईल. अशा अर्जांवर चार आठवड्यांत निर्णय घ्यावा. परवानगी दिल्यास ती दोन आठवडे लागू होणार नाही.

दरम्यानच्या काळात या खटल्यातील याचिकादार गोवा फाउंडेशन मुख्य वन्य जीव संरक्षकांच्या निर्णयाविरोधात न्यायालयात दाद मागू शकेल.

काले रेल्वे स्थानकावर ११ हजार ५०० मेट्रिक टन खनिज आणण्यात आले होते, त्याची वाहतूक सुरू असताना ती बेकायदा असल्याचा दावा करत गोवा फाउंडेशनने न्यायालयात धाव घेतली होती. न्यायालयाने अंतरिम आदेशाद्वारे खनिज वाहतुकीवर बंदी घातली होती.

त्या खानिजापैकी ९ हजार ५२६ मेट्रिक टन मालाची वाहतूक करण्यात आली आहे. निर्यातीसाठी उर्वरित खनिजाची वाहतूक करणे आवश्यक असल्याचे ती करण्यास न्यायालयाने मान्यता दिली आहे.