आगोंद: आगोंद येथील किनाऱ्यावरील सील करण्यात आलेल्या पर्यटन व्यवसायामुळे त्रस्त नागरिकांनी सोमवारी सकाळी उपजिल्हाधिकारी कार्यालयावर निषेध मोर्चा काढला. यात टाळे ठोकण्यात आलेले पर्यटन व्यावसायिक व अन्य नागरिकांनी सहभागी झाले होते. आंदोलकांनी उपजिल्हाधिकारी मधू नार्वेकर यांची भेट घेउन आपल्या मागण्याचे निवेदन त्यांना सादर केले.

यावेळी शॅक ओनर्स संघटनेचे धर्मेश सगलानी, आगोंदचे सरपंच नीलेश पागी, सूरज नाईक गावकर, बरसात नाईक गावकर, नगरसेवक सायमन रिबेलो, शुभम कोमरपंत,हेमंत नाईक गावकर, धीरज नाईक गांवकर, पंच रामनाथ वेळीप आदी उपस्थित होते.

हा मोर्चा सरकार विरोधात नसल्याचे यावेळी स्पष्ट करण्यात आले. दरम्यान, माजी आमदार विजय पै खोत, सामाजिक कार्यकर्ते शांताजी नाईक गावकर, जनासेन प्रमुख जनार्दन भंडारी, प्रशांत पागी, नगरसेवक शुभम कोमरपंत, सायमन रिबेलो, माजी पोलिस अधीक्षक महेश ना. गावकर, माजी नगराध्यक्ष राजेंद्र देसाई, हेमंत नाईक गावकर आदींनी आंदोलकांची भेट घेउन पाठिंबा व्यक्त केला.

यावेळी सूरज नाईक गावकर यांनी सांगितले की, टाळे ठोकण्यात आलेल्या आस्थापनांकडे सर्व परवाने आहेत. या विरोधात न्यायालयीन लढाही दिला जाईल. विधानसभेतील ४० ही आमदारांनी या प्रश्नावर विधानसभेत आवाज उठवावा.

तसेच कायदेशीर आस्थापनांना अभय द्यावे, असे सांगितले. उपाध्यक्ष पंकज नाईक गावकर, गोवा फॉरवर्डचे विकास भगत, सरपंच नीलेश पागी, धर्मेश सगलानी यांनी यावेळी मार्गदर्शन केले.