Dhangar Festival : डिचोली, लोकनृत्यांचा आविष्कार आणि अन्य कार्यक्रमांसह अडवलपाल येथे सहावा ‘धनगर महोत्सव’ उत्साहात साजरा करण्यात आला.

कला आणि संस्कृती खात्याच्या सहकार्याने डिचोली तालुका गोमंतक धनगर समाजोन्नती मंडळातर्फे धनगरवाडा-अडवलपाल येथील श्री विठ्ठल रखुमाई संस्थानात या महोत्सवाचे आयोजन करण्यात आले होते.

या महोत्सवाला प्रमुख पाहुणे म्हणून लोककलाकार गोपीनाथ गावस तर खास अतिथी म्हणून माजी आमदार नरेश सावळ उपस्थित होते. अन्य मान्यवरांत धनगर समाजोन्नती मंडळाचे डिचोली तालुका अध्यक्ष दिलीप वरक, उपाध्यक्ष गंगाराम वरक आदींचा समावेश होता. मान्यवरांच्या हस्ते महोत्सवाचे उद्‌घाटन करण्यात आले.

या महोत्सवात दहावी, बारावी, पदवी आणि पदव्युत्तर परीक्षेत ५०हून अधिक टक्के गुण प्राप्त केलेल्या समाजातील गुणवंत विद्यार्थ्यांचा गौरव करण्यात आला. यावेळी मंडळाच्या दिनदर्शिकेचे मान्यवरांच्या हस्ते प्रकाशन करण्यात आले.

या महोत्सवात लोकनृत्यांचा आविष्कार घडला. धनगरी गजानृत्य आदी विविध लोकनृत्यांचे सादरीकरण करण्यात आले. दिलीप वरक यांनी स्वागत, प्रास्ताविक केले. ऐश्वर्या नायर यांनी सूत्रसंचालन केले. लक्ष्मण लांबोर यांनी आभार मानले.

वेशभूषा स्पर्धेला उत्स्फूर्त प्रतिसाद

महोत्सवानिमित्त घेण्यात आलेल्या वेशभूषा स्पर्धेत लहान गटात निष्कर्ष कुडासकर याने प्रथम, द्वितीय आणि तृतीय क्रमांकाचे बक्षीस अनुक्रमे आर्यन वरक आणि आतिष झोरे यांना प्राप्त झाले.

मोठ्या गटात यश वरक याने प्रथम, द्वितीय आणि तृतीय क्रमांकाचे बक्षीस अनुक्रमे सिद्धेश लांबोर आणि नरेश वरक यांना प्राप्त झाले.