Naresh sawal meeting cm pramod sawant Advalpal Sarpanch

डिचोली: सरपंचपद रिक्त झालेल्या डिचोली मतदारसंघातील अडवलपाल पंचायतीत सध्या सत्तासंघर्षाचे नाट्य सुरु झाले असून या नाट्यात माजी आमदार नरेश सावळ हेदेखील सक्रिय झाल्याची माहिती आहे.

अडवलपाल पंचायतीच्या पाचपैकी चार पंचसदस्यांना सोबत घेऊन सावळ यांनी मुख्यमंत्री प्रमोद सावंत यांची भेट घेतली आहे. त्यामुळे या पंचायतीवर आपले वर्चस्व प्रस्थापित करण्यासाठी माजी आमदारांनी कंबर कसल्याचे स्पष्ट झाले.

सरपंचपदाची निवडणूक घ्या

अडवलपाल पंचायतीचे पदच्युत सरपंच गजानन पालकर यांच्यासह विद्यमान उपसरपंच विनश्री गावकर, सुबत्ता सामंत आणि गीतेश गडेकर यांच्यासह नरेश सावळ यांनी आज (शनिवारी) साखळी येथे सावंत यांची भेट घेतली आहे. अडवलपाल पंचायतीचे सरपंचपद रिक्त झाल्यास बावीस दिवस उलटून गेले आहेत.

मात्र अद्याप रिक्त सरपंचपदासाठी निवडणूक जाहीर झालेली नाही. त्यामुळे विकासकामांवर परिणाम होत आहे. असे या गटाने मुख्यमंत्र्यांच्या निदर्शनास आणून दिले. सरपंचपदासाठी लवकर निवडणूक घ्यावी, अशी मागणी या गटाने मुख्यमंत्र्यांकडे केल्याची माहिती मिळाली आहे.

दरम्यान, स्थानिकांचा विरोध असताना खाणीला ‘एनओसी’ दिल्यामुळे अडवलपाल पंचायतीचे सरपंच गजानन पालकर यांना सरपंचपद गमवावे लागले आहे.