MP Francisco Sardinha: हेल्मेट न घातलेल्यांवर, वाहन परवाना न बाळगणाऱ्या चालकांवर कारवाई व्हायलाच हवी, शिवाय जे अंदाधुंद वाहन चालवितात त्यांच्यावर पोलिसांनी दंडात्मक कारवाई करावी, अशी सूचना दक्षिण गोव्याचे खासदार फ्रान्सिस सार्दिन यांनी आज मडगावात घेतलेल्या पत्रकार परिषदेत केली.

गेल्या दोन महिन्यात ४०४ अपघात व ४१ अपघाती मृत्यू हे वाचून आपल्याला धक्काच बसला, असे सांगून सार्दिन म्हणाले की सरकारने अपघातग्रस्त ठिकाणांचे सर्वेक्षण करुन तिथे पोलिस कुमक वाढवली पाहिजे. दुसरीकडे अपघातासाठी बिघ़डलेले रस्ते हेही एक कारण असू शकते. सार्वजनिक बांधकाम खात्याने हे रस्ते तातडीने दुरुस्त करावेत, असेही सार्दिन म्हणाले.

सरकारने वीज दरवाढ ६ टक्क्यांनी वाढविण्याचा प्रस्ताव पुढे केला आहे, त्याला आपला विरोध आहे. वीज खाते तोट्यात आहे, हे खरे तरी सरकारने लोकांसाठी थोडी कळ सोसावी. वीज गळतीचा शोध घेऊन ती रोखावी. सर्वच क्षेत्रात महागाई वाढली आहे. त्यात वीजदरवाढीचा बोजा लोकांवर टाकू नये, असेही सार्दिन म्हणाले.

रात्रीची ध्वनी मर्यादा ११ पर्यंत करावी, जुने गोवे येथील अनधिकृत बंगला पाडावा व माजोर्डानंतर वास्कोपर्यंत डबल ट्रॅकिंग करू नये, अशी मागणीही केली. ते म्हणाले डबल ट्रॅकिंग संदर्भात आपण केंद्रीय रेल्वे मंत्र्यांशी बोललो आहे व पंतप्रधानसह इतर संबंधित मंत्र्यांना व अधिकाऱ्यांना निवेदन दिले आहे. हा प्रश्र्न आपण संसदेतही उपस्थित करणार असल्याचे ते म्हणाले.

रेतीव्यवसायाला मुभा द्यावी

गोव्यात रेतीव्यवसायासाठी पूरक अशी स्थिती आहे. मात्र, सरकारने रेती उपशासाठी काही जागा निश्‍चित करून तिथे परवानगी द्यावी, जेणेकरून रेतीचा जो अवैध व्यवसाय सुरू आहे, तो बंद होईल. रेती व चिरे (दगड) खाणीसाठी सरकार कायदेशीररीत्या काहीही उपाय शोधत नाही. तसे केल्यास अधिकारी व राज्यकर्त्यांच्या मिळकतीवर परिणाम होईल, ही भीती त्यांना आहे. रेतीचे दर वाढलेले आहेत व एक चिरा ५६ रुपये एवढे झाला आहे. त्यामुळे घरबांधणी भयंकर महागल्याचे सार्दिन म्हणाले.