डिचोली, ता. ४ (प्रतिनिधी)ः जून महिन्यात लोकार्पण केलेल्या डिचोलीतील चौपदरी बगलमार्गावर अपघातांचे सत्र सुरूच आहे. या बगलमार्गावर अज्ञात वाहनाने चिरडल्याने दोन वासरांसह चार गुरांचा बळी गेला. व्हाळशी जंक्शनजवळ काल रात्री हा अपघात घडला. अपघातानंतर अज्ञात वाहनचालकाने अपघात स्थळावरून वाहनासह पलायन केले.

या अपघाताची माहिती मिळताच अग्निशमन दलाचे जवान तसेच पोलिस अपघातस्थळी दाखल झाले. त्यांनी रस्त्यावर तडफडून मेलेल्या गुरांना बाजूला केले, तर डिचोली नगरपालिकेने आज सकाळी जेसीबी यंत्राच्या मदतीने मृत गुरांची विल्हेवाट लावली. यावेळी नगराध्यक्ष कुंदन फळारी उपस्थित होते. आत्तापर्यंत पाच गुरांचे बळी

डिचोली बगलमार्गाचे ६ जून रोजी लोकार्पण केल्यानंतर आत्तापर्यंत या बगलमार्गावर लहानसहान मिळून किमान दहा अपघात घडले आहेत. कालची चार मिळून आत्तापर्यंत या बगलमार्गावर पाच गुरांचे बळी गेले आहेत. गेल्या २३ जून रोजी रात्री या बगलमार्गावर अज्ञात वाहनाने धडक दिल्याने एका म्हशीचा पहिला बळी गेला होता. त्यानंतर काल रात्री एकाचवेळी चार गुरे दगावली आहेत.

बगलमार्ग वाहतुकीस धोकादायक

या बगलमार्गावर मोकाट गुरांचा संचार वाढला आहे. वाठादेव आणि व्हाळशी जंक्शनसह बगलमार्गावर गुरांचा वावर वाढला आहे. रात्रीच्यावेळी तर ही गुरे सदैव बगलमार्गावर ठाण मांडून असतात. त्यामुळे हा बगलमार्ग वाहतुकीसाठी धोकादायक बनला आहे. चौपदरी बगलमार्ग असल्यामुळे वाहनेही वेगात असतात. ठाण मांडून बसणाऱ्या गुरांचा अंदाज येत नसल्याने वाहनचालकांना अक्षरशः कसरत करावी लागते. निष्पाप गुरांचे बळी जातात. या गुरांमुळे एखाद्यावेळी भयानक अपघात घडण्याची शक्यता नाकारता येत नाही.