ख्रिसमस पार्टीवरून परतत असताना बांबोळी रस्त्यावर एका स्कूटरचा अपघात घडला आहे. यामध्ये स्कूटीवरील दोन तरुण जखमी झाल्याचे सांगण्यात येते. घटनास्थळावरील प्रथमदर्शींनी दिलेल्या माहितीनुसार, चालक भरधाव वेगात गाडी चालवत असल्यामुळे हा अपघात घडला आहे.

उपलब्ध माहितीनुसार, अपघातावेळी दोघेही साधारण 100 मीटरपर्यंत फरफटत गेले. यावेळी स्कूटीवरील दोघे तरुण जखमी झाले असून त्यातील एका तरुणाची शुद्ध हरपली. दरम्यान, त्यातील एकाने प्रतिसाद देणे बंद केले.

त्यावेळी तिथून जात असलेल्या विजय रेडकर यांनी पुढाकार घेत सदर तरुणाच्या छातीवर दाब (सीपीआर) दिल्यामुळे तो तरुण पुन्हा शुद्धीवर आला.

कुणीच मदतीला आले नाही...

जखमी झालेले दोघेही वेदनेमध्ये असलेले दिसूनही रस्त्यावरील येणारे-जाणारे anekअनेक लोक थांबले नाहीत. हे निदर्शनास येताच विजय रेडकरने आपली गाडी थांबली आणि शुद्ध हरपलेल्या तरुणाला मदत केली. शुद्धीवर आल्यावर त्या तरुणाने विजयचे आभार मानले. विजयच्या मदतीमुळेच आपल्याला नवीन जीवन मिळाले असल्याचे मत जखमी तरुणाने व्यक्त केले.

ख्रिसमस-नवीन वर्षाच्या सेलिब्रेशन काळात अपघातात वाढ....

ख्रिसमस आणि नवीन वर्षाचे सेलिब्रेशन करण्यासाठी मोठ्या प्रमाणात पर्यटकांचा लोंढा गोव्यात दाखल होत असतो. यामध्ये स्थानिकही सहभागी असतात. पार्टीमध्ये मद्यप्राशन करून वाहने चालवण्याचे प्रमाणही वाढले असून यामुळेच राज्यात अपघात घडत आहेत. त्यामुळे चालकांनी वाहतुकीचे नियम पाळवेत, असे आवाहन पोलिसांनी केले आहे.