Goa Accident Death: म्हापसा येथील राष्ट्रीय महामार्गावरील पेडे जंक्शनवर सहा वाहनांमध्ये विचित्र अपघात झाल्याची घटना रविवारी दुपारी 1 वाजता घडली. या अपघाताामुळे मार्गावरील वाहतूक बराच वेळ खोळंबली होती.

अपघातात तीन ट्रक व तीन दुचाकींचा समावेश होता. या अपघातात पाचजण किरकोळ जखमी झाले. पेडे जंक्शन येथे आज दुपारी करासवाडाहून पणजीच्या दिशेने मालवाहू ट्रक (एमएच ४६ बीएम १२५१) जात होता, त्याचवेळी जंक्शनवर पाण्याचा टँकर (जीए ०३ डब्ल्यू १२०२) वळण घेत होता. यादरम्यान त्यास या मालवाहू ट्रकने ठोकर दिली.

त्यामुळे ही दोन्ही वाहने रस्त्याच्या विरुद्ध दिशेने असलेल्या तिसऱ्या मालवाहू (जीए ०८ व्ही ७५०७) वाहनांवर जाऊन स्थिरावली आणि याच मालवाहूला पाठीमागून एका दुचाकीने ठोकर दिली. यात जंक्शनवर असलेल्या दोन दुचाकी या ट्रकखाली सापडल्या. या दोन्ही दुचाकींवरील चालक किरकोळ जखमी झाले.

पाचजण जखमी

ईअन फर्नांडिस (३४, पेडे), मोहनलाल कामी (३८, करासवाडा), मनिष कामी (११, करासवाडा), प्रवीण सातार्डेकर (४४, म्हापसा) व उर्वी सातार्डेकर (३२, म्हापसा) हे पाचजण किरकोळ जखमी झाले.