Panjim Accident : पणजीजवळच असलेल्या ताळगावात आज सकाळी एक विचित्र अपघात पाहायला मिळाला. विद्यापीठ रोडवर सोमवारी पहाटे 3.30 ते 4 वाजण्याच्या दरम्यान एका भटक्या गायीला कारने धडक दिल्याने कारचालक किरकोळ जखमी झाला. या अपघातात कारचंही नुकसान झालं आहे.

पणजी शहर पोलिसांनी दिलेल्या माहितीनुसार, आज सकाळी ८ वाजता पोलिसांना अपघाताचा वायरलेस संदेश मिळाला. त्यानंतर तातडीने पोलिसांचं एक पथक घटनास्थळी दाखल झालं. अपघातामध्ये कारच्या विंडशील्डचा चक्काचूर झाला असून पुढील भागाचे पूर्ण नुकसान झाले आहे. वाहनाच्या धडकेने गंभीर जखमी झालेली गाय मये येथील गोशाळेत हलविण्यापूर्वी बराच वेळ अपघात झालेल्या ठिकाणी एकाच जागेवर पडून होती.

पणजी शहर पोलिस स्टेशनचे सहाय्यक पोलीस निरीक्षक शेखर आमोणकर यांनी या अपघाताबाबत माहिती दिली आहे. अपघातग्रस्त कारच्या चालकाचं नाव फेलिक्स डिसोझा असं असून तो किरकोळ जखमी होऊन बालंबाल बचावला असल्याचं त्यांनी म्हटलं आहे. अपघाताच्या वेळी डिसूझा यांनी सीट बेल्ट घातला असल्याने मोठा अनर्थ टळला. अन्यथा ते कारमधून बाहेर फेकले गेले असते, अशी भीतीही आमोणकर यांनी व्यक्त केली. याठिकाणी शेजारी राहणाऱ्या काही मजुरांच्या म्हणण्यानुसार, चालकाच्या नकळत भरधाव वेगाने येणाऱ्या कारसमोर अचानक गाय आल्याने अपघात झाला आहे.