Goa Accident News: राज्यात अपघातांची मालिका काही केल्या थांबण्याचे नाव घेत नाही. आज (शुक्रवार) सकाळी थिवी येथे एका अपघाताची नोंद झाली आहे. गाडी चालकाचा गाडीवरील ताबा सुटल्याने कर्नाटक नोंदणीकृत भाजीवाहू टेम्पो कांसाबोर्ड थिवी येथे उरतीवर रस्त्याबाजूला गेला.

सुदैवाने कुठलीही जीवितहानी झाली नसून, कोलवाळ पोलिसांच्या मदतीने रस्त्यावर पडलेला भाजीपाला दुसऱ्या गाडीत भरण्यात आला. सदर घटना आज पहाटे घडली आहे.

तर दुसरीकडे, धारगळ येथेही अपघात झाल्याची माहिती समोर आली आहे. धारगळमधील दोन खांब येथे दोन चारचाकींमध्ये जोरदार धडक बसली. मात्र यामध्ये कुणालाही इजा झाली नाही.

तर तिसऱ्या घटनेत एका कारचा स्वयं अपघात झाला आहे. मालपे येथील रस्त्यावर ही घटना घडली. भरधाव वेगात असलेली कार रस्त्याकडेला जाऊन आदळली. यामध्ये कारच्या पुढील बाजूचे मोठ्या प्रमाणात नुकसान झाले.

माहितीनुसार, सदर कार महाराष्ट्रातील असून, यामध्ये चौघेजण प्रवास करत होते. अग्निशमन दलाच्या जवानांनी चालकाला आणि इतर प्रवाशांना बाहेर काढले. जुन्या रस्त्यावरून तोल जाऊन कार 15 मीटरवरून खालच्या नव्या रस्त्यावर कोसळली. यामध्ये चौघेजणही गंभीर जखमी झाले असून त्यांना उपचारासाठी रुग्णालयात दाखल करण्यात आले आहे. ही घटना पहाटे 3.40 च्या सुमारास घडली.