मडगाव : दक्षिण गोव्यात आज एक भीषण अपघात पाहायला मिळाला आहे. कुडतरी येथे रुग्णवाहिका आणि स्कोडा कार यांची समोरासमोर धडक बसून भीषण अपघात झाला आहे. आज सकाळी 11 वाजण्याच्या सुमारास झालेल्या या अपघातानंतर रुग्णवाहिकेने अचानक पेट घेतला. (Accident between Skoda and Ambulance in Curtorim News Updates)

अपघातग्रस्त रुग्णवाहिका कुडचडे आरोग्य केंद्राच्या रुग्णालयाशी संलग्न होती आणि एका रुग्णाला ती मडगावला घेऊन जात होती. या अपघातानंतर वाहनांचा धक्का जवळच्या असलेल्या वीज खांबाला बसून विजेची ठिणगी रुग्णवाहिकेवर पडली. त्यामुळे रुग्णवाहिकेने पेट घेतला असावा असा अंदाज वर्तवला जात आहे. अपघातात सापडलेली दोन्ही वाहने वेगात होती अशी माहिती तेथील प्रत्यक्षदर्शीनी दिली.

या रुग्णवाहिकेत एका रुग्णासह परिचारिका आणि रुग्णाचा नातेवाईक होता. त्या सर्वांना बाहेर काढल्यावर रुग्ण वाहिकेने पेट घेतल्याने सुदैवाने अनर्थ टळला आहे. मात्र या अपघातात ती परिचारिका किरकोळ जखमी झाली. या घटनेची माहिती मिळाल्यावर स्थानिक आमदार आलेक्स रेजिनाल्ड लॉरेन्स तिथे त्वरित हजर झाले. त्यानंतर लगेच दुसरी रुग्णवाहिका बोलावून घेऊन त्या रुग्णाला हॉस्पिसियो इस्पितळात हलविण्यात आले. स्कोडा गाडीच्या चालकलाही किरकोळ मार बसल्याचे सांगण्यात आले.