पोस्टाचे गोवा आणि महाराष्ट्रासाठी एकच सर्कल असल्याने गोव्यातील तरुणांना नोकरीची संधी मिळत नाही. गोव्यासाठी स्वतंत्र सर्कल निर्मिती करण्याची मागणी, आपचे आमदार वेंझी व्हिएगस यांनी केली. विधानसभा पावसाळी अधिवेशनाच्या सतराव्या दिवशी (०६ ऑगस्ट) शून्य प्रहरात आमदार व्हिएगस बोलत होते.

पोस्टाचे गोवा आणि महाराष्ट्रासाठी एकच सर्कल आहे. यामुळे या खात्याच्या गोव्यातील रोजगारसंधी देखील महाराष्ट्रीयन तरुणांना मिळत आहेत. गोमंतकीय तरुण यामुळे रोजगारापासून वंचित राहत असल्याची खंत आमदार व्हिएगस यांनी सभागृहात उपस्थित केली.

गोव्यासाठी पोस्टाचे स्वतंत्र सर्कल निर्मिती करण्याची मागणी व्हिएगस यांनी केली.

दरम्यान, पोस्टातील रोजगारसंधीसाठी दहावीच्या शिक्षणाचा संदर्भ घेतला जातो. दहावीचे मार्क विचारात घेतले जातात. गोवा आणि महाराष्ट्र सर्कल एक असल्याने दहावीचे सर्वाधिक मार्क विचारात घेतले जातात.

गोव्यात पूर्वीच्या शिक्षण पद्धतीनुसार मराठी तिसऱ्या भाषेचा पर्याय होता. कोकणीचा अलिकडे पर्याय म्हणून घेतला जात आहे. गोवा सर्कलचा वेगळा विचार करुन कोकणीचे मार्क विचारात घ्यावे, अशी मागणी केली आहे. याबाबत येत्या काही दिवसांत अंमलबजावणी होणे, अपेक्षित असल्याची माहिती मुख्यमंत्री डॉ. प्रमोद सावंत यांनी दिली.