Amit Palekar : गोवा नगरपालिका कायद्यात सुधारणा घडवून सरकार लोकशाहीचा खून करण्याचे षडयंत्र रचत आहे. आजपर्यंत सर्व निर्णय, मग ते आमदार खरेदी असो किंवा धोरणात्मक सुधारणा, सगळेच निर्णय रात्रीच्या अंधारात घेतले जात असून आता देखील भाजपचे ‘रात्रीस खेळ चाले’ धोरण सुरू आहे, असा टोला आम आदमी पक्षाचे प्रदेशाध्यक्ष ॲड. अमित पालेकर यांनी हाणला.

पणजी येथे पत्रकार परिषदेत ते बोलत होते. यावेळी ‘आप’चे आमदार वेन्झी व्हिएगस आणि क्रूझ सिल्वा उपस्थित होते. आज भाजप सरकारमुळे देश आणि राज्यातील लोकशाही धोक्यात आली आहे. भाजप ‘ऑपरेशन लोटस’च्या माध्यमातून किंवा इतर मार्गांचा अवलंब करून विरोधक संपवण्याचा कट रचत आहे. मात्र, ‘आप’चे नेते भाजपच्या षडयंत्राला कदापि बळी पडणार नाहीत, असे क्रूझ सिल्वा यांनी ठणकावून सांगितले.

लोकशाही उद्‍ध्वस्त करण्याचा डाव

यापूर्वीच काँग्रेसचे आठ आमदार विकत घेऊन भाजपने गोमंतकीय जनतेचा विश्‍वासघात केला आहे. आता नगराध्यक्ष आणि उपनगराध्यक्षांची निवडणूक गुप्त मतदान पद्धतीने न घेता, ती नगरसेवकांनी हात उंचावून करण्याच्या पद्धतीला मान्यता देण्याबाबतचा वटहुकूम काढला आहे. तळागाळापर्यंत रुजलेली लोकशाही उद्‍ध्वस्त करण्याचा हा भाजप सरकारचा प्रयत्न आहे, असा आरोप ॲड. पालेकर यांनी केला.