पणजी : राज्यातील रस्त्यांवरील खड्डे आणि अटल सेतू पुलावरील खराब झालेला रस्ता हे भ्रष्टाचाराचे मुख्य कारण असल्याची टिका आम आदमी पक्षाने केली आहे. पक्षाच्या कार्यालयात आयोजित करण्यात आलेल्या पत्रकार बैठकीत वाल्मिकी नाईक, सेसिल रॉड्रिगीस, सुनील शिंगणापूरकर उपस्थित होते.

सार्वजनिक बांधकाम खात्यामध्ये मोठ्या प्रमाणात भ्रष्टाचार असल्याने राज्यात रस्ते दुरुस्तीचे काम रेंगाळलेले आहे. अटल सेतूवरील कामासाठी निकृष्ट दर्जाचे वापरले आहे. त्यामुळेच सातत्याने खड्डे पडत आहेत. या कामासाठी मद्रास आयआयटीकडून चाचणी करून घेण्यात येणार आहे. मात्र, मुळातच हे काम निकृष्ट दर्जाचे असल्याने संबंधितांवर कारवाई होणे गरजेचे आहे, अशी मागणीही पत्रकार परिषदेत वाल्मिकी नाईक यांच्याकडून करण्यात आली.

राज्यातील मुख्य रस्ते, शहरांना जोडणारे आणि गावातील रस्ते वर्षानुवर्षे खड्ड्यांनी भरलेले आहेत. गेल्या चार वर्षांत सातत्याने खड्डे बुजवल्याचे सांगून जनतेची दिशाभूल करीत आहे. बुजवलेले खड्डे आठ ते पंधरा दिवसांत पुन्हा डोके वर काढत आहेत. सरकारने जनतेच्या डोळ्यात चालवलेली ही धूळफेक आहे. सरकारने उत्तम दर्जाचे साहित्य वापरून पक्के रस्ते निर्माण करावेत, अशी मागणी सेसिल रॉड्रिगीस यांनी केली.