Goa Police: उत्तर गोव्यातील हणजुणे येथील समुद्रात बुडणाऱ्या पाँडिचेरीच्या एका पर्यटकाचा जीव दोन पोलिस कॉन्स्टेबल्समुळे वाचला. पी. दिलिपसिवम पोन्नामबलम (वय 33) असे या पर्यटकाचे नाव आहे.

तो सोलो ट्रॅव्हलर आहे. तर त्याचा जीव वाचविणाऱ्या पोलिस कॉन्स्टेबलचे नाव आहे, अभिनय मलिक आणि सुशांत गाडेकर.

हणजुणे बीच येथे हा पोन्नामबल हे समुद्र स्नानासाठी म्हणून पाण्यात उतरला होता. पण त्याला पाण्याचा अंदाज आला नाही. त्यामुळे तो गटांगळ्या खाऊ लागले.

त्याला बुडताना पोलिस कॉन्स्टेबल अभिनय मलिक आणि सुशांत गाडेकर यांनी पाहिले. त्यांनी वेळ न दवडता तत्काळ त्याच्या दिशेने धाव घेतली.

आणि त्याला पाण्यातून बाहेर काढले. दोन्ही पोलिसांनी दाखवलेल्या तत्परतेमुळे या पर्यटकाचा जीव वाचला. त्यामुळे परिसरातील सर्वजण पोलिसांचे कौतूक करत होते.

गोव्यात पर्यटन हंगामात अनेक पर्यटक येत असतात. वारंवार सूचना करूनही त्याकडे दुर्लक्ष केल्यामुळे, पाण्याचा अंदाज न आल्यामुळे अनेक पर्यटकांवर अशी पाण्यात गटांगळ्या खायची वेळ येते.

गेल्याच महिन्यात बंगळूरच्या सहा पर्यटकांना दृष्टी मरिनच्या लाईफगार्ड्सनी बुडण्यापासून वाचवले होते.