पणजी: सुमारे 38 ऑलिव्ह रिडले समुद्री कासवाची पिल्ले गोवा वनविभागाच्या अधिकाऱ्यांनी गालजीबाग, काणकोण येथे समुद्रात सोडली. गालजीबाग आणि आगोंद येथे नामशेष होणाच्या मार्गावर असणाऱ्या या कासवांची डिसेंबर 2021 पासून 23 घरटी मिळाली होती. त्यांचे योग्य संवर्धन केल्याने आज 38 ऑलिव्ह रिडले समुद्री कासवाची पिल्ले (Ridley baby turtle) इवल्या इवल्यांनी त्यांच्या नैसर्गिक अधीवासात गेली आहेत.

(A total of 38 baby hatchlings were released into the sea near Galgibag)

याच्या आधी आगोंद (Agonda) व गालजीबाग येथील कासव संवर्धनासाठी आरक्षित समुद्र किनाऱ्यावर उशिरा का होईना सागरी कासवांच्या आगमनामुळे वन खात्याच्या अधिकाऱ्यांनी समाधान व्यक्त केले होते. या दोन्ही ठिकाणी 24 कासवांनी एकूण 17 घरट्यांमध्ये 570 अंडी घातली. ही सर्व अंडी संरक्षित केली आहेत. त्यावेळी 4 ऑलिव्ह रिडले (Ridley)कासवांची पिल्ले समुद्रात (sea) सोडण्यात आली होती.

तर 31 डिसेंबर रोजी पहाटे या हंगामातील पहिल्या सागरी कासवाने 118 अंडी घातली होती. तर 3 जानेवारी रोजी 2 रिडले कासवांनी 90 अंडी दिली. तर आणखी एका कासवाने 118 अंडी घातली होती. या घटनेची माहिती मिळताच बार्से येथील वन खात्याचे अधिकारी आणि अन्य कर्मचाऱ्यांनी या केंद्राला भेट देऊन पाहणी केली होती.

दरम्यान गोव्याचे (goa) तत्कालीन मंत्री तथा आगोंदचे सुपुत्र स्व. संजय बांदेकर यांच्या प्रयत्नांतून उत्तर गोव्यात मोरजी तर दक्षिण गोव्यात आगोंद आणि गालजीबाग असे तीन समुद्र किनारे कासव संवर्धनाकरिता राखीव ठेवण्यात आले आहेत.