Goa Accident News: राज्यातील वाढते अपघात व होणाऱ्या मृत्यूची संख्या पाहता पोलिसांनी जागोजागी उभे करून वाहतूक नियम मोडणाऱ्यांवर कारवाई करण्याचा धडाका लावला असला तरी अपघातांची संख्या कमी होत नाही.

गुरूवारी सकाळी शिवनगर-तिळामळ येथे दुचाकीस्वाराने गाईला धडक दिल्याने झालेल्या अपघातात मुस्लिमवाडा केपे येथील वसीम खान (23) याचे जागीच निधन झाले.

केपे पोलिसांनी दिलेल्या माहितीनुसार, आज सकाळी ६.३० वा. शिवनगर येथील मुख्य रस्त्यावर एक युवक जखमी अवस्थेत पडून असल्याचे सकाळी जॉगिंगला गेलेल्या एका व्यक्तीने पाहिले.

याची माहिती पोलिसांना दिली असता पोलिसांनी त्वरित घटनास्थळी धाव घेऊन १०८ रुग्णवाहिकेतून त्याला केपे प्राथमिक आरोग्य केंद्रात दाखल केले. तेथील डॉक्टरांनी तपासणी करून त्याला मृत घोषित केल्याचे पोलिसांनी सांगितले.

वसीम खान हा कुडचडे येथे कामाला होता व सकाळी तो आपल्या दुचाकीने कामावर जात असताना हा अपघात झाल्याचे लोकांनी सांगितले. केपे पोलिसांनी पंचनामा करून मृतदेह कुटुंबीयांच्या स्वाधीन केला असून पुढील तपास सुरू आहे.