Paragliding : समुद्राच्या लाटांच्या साथीने आपला प्रत्येक ख्रिसमस गोव्यात साजरा करणाऱ्या एका वयोवृध्द जर्मन जोडप्यासाठी यंदाचा मोसम भयानक ठरला. समुद्र किनाऱ्यावर जे अनिर्बंध समुद्रक्रीडेचे प्रकार चालतात त्याचा फटका या दाम्पत्याला बसला. येथे चालू असलेल्या पॅराग्लायडींगची धडक बसल्याने जर्मन नागरिकांवर आपल्या हाताची पाच बोटे गमावण्याची पाळी आली.

ही दुर्देवी दुर्घटना २४ नोव्हेंबर रोजी घडली. ख्रिसमस गोव्यात साजरा करण्यासाठी जर्मन जोडपे बेतालभाटी येथे एका गेस्ट हाऊसमध्ये उतरले होते. हे जोडपे सायंकाळच्या वेळी समुद्र किनाऱ्यावर चालत जात असताना एक पॅराग्लाईड जेट त्यांच्या अंगावर आले. आपले डोके सांभाळण्यासाठी त्यांनी आपले हात डोक्यावर घेतले. त्यामुळे त्यांचे डोके सही सलामत राहिले खरे, पण त्यांचा हात गंभीर जखमी झाल्याने डायटर ईचलर (८७) या जर्मन नागरिकाला इस्पितळात दाखल करावे लागले. त्यांच्या उपचारांवर या दाम्पत्याला एकूण सात लाखाचा खर्च करावा लागला. एवढे करूनही त्यांच्या हाताची बोटे काही ठीक होऊ शकली नाहीत.

पालये, केरी या गावांच्या, लोकवस्तीच्या परिसरात चालणारा मोटर ग्लायडिंगचा व्यवसाय अवैधरित्या सुरू असल्याचा आरोप स्थानिकांचा आहे. यावर बंदी घालावी अथवा या व्यवसायाचे लोकवस्ती नसलेल्या ठिकाणी स्थलांतर करावे, अशी मागणी स्थानिकांकडून होत आहे.