उसगाव येथे एका मूक-बधीर महिलेवर बलात्कार केल्याची तक्रार फोंडा पोलिस स्थानकात नोंद झाली असून याप्रकरणी पोलिसांनी तक्रारदार महिलेच्या नातेवाईकालाच अटक केली आहे.

उसगावातील ही मूक-बधीर महिला साधारण पस्तिशीच्या आसपास असून संशयित आरोपी तिचा नातेवाईक असून तोही त्याच वयाचा आहे. तक्रारदार महिला फोंडा पोलिस स्थानकात आली. ही महिला मूक-बधीर असल्याने पोलिसांना तिचे हावभाव समजून घेणाऱ्या इसमाची मदत घ्यावी लागली. त्यानंतर पोलिसांनी तक्रार नोंद केली.

तक्रारदार महिलेच्या म्हणण्यानुसार, गेल्या वर्षभरात तिच्यावर दोनवेळा बलात्कार झाला असून संशयित आरोपीने तक्रार केल्यास जीवे मारण्याची धमकी दिली होती. त्यामुळे ती महिला गप्प राहिली होती. मात्र, दुसऱ्यांदा बलात्कार केल्यानंतर या महिलेने थेट फोंडा पोलिस स्थानक गाठले. पोलिसांनी पीडित महिलेची वैद्यकीय तपासणी करून संशयिताला अटक केली. संशयिताला न्यायदंडाधिकाऱ्यांनी पाच दिवसांचा रिमांड बजावला आहे.