Goa Crime: कोलवाळ कारागृह विभाग-२ चे फाटक अडवून तसेच तुरुंग अधीक्षक आणि कर्मचाऱ्यांना धमकी देत कर्तव्यात आडकाठी आणल्याप्रकरणी कोलवाळ पोलिसांनी कैदी विकट भगत याच्याविरोधात गुन्हा दाखल केला आहे.

उपलब्ध माहितीनुसार, ही घटना काल सायंकाळी ४.४५ च्या सुमारास घडली. तुरुंग अधीक्षक शंकर गावकर यांनी याप्रकरणी कोलवाळ पोलिसांत तक्रार दाखल केली आहे. तुरुंग प्रशासनाने कैदी विकट भगत याचे कारागृहातील अंडर ट्रायल कैद्यांच्या विभाग २ मधून विभाग ४ मध्ये स्थलांतर करण्याचा आदेश जारी केला होता.

या आदेशानुसार तुरुंग अधीक्षक गेले असता कैदी विकट भगत याने इतर कैद्यांना बोलावून फाटक अडवले आणि अधीक्षक व कर्मचाऱ्यांना गंभीर परिणामांची धमकी दिली. या प्रकरणी कोलवाळ पोलिसांनी कैदी विकट भगत याच्याविरुध्द गुन्हा नोंद केला असून पुढील तपास कोलवाळ पोलिस निरीक्षक विजय राणे यांच्या मार्गदर्शनाखाली हवालदार अनिल पिळगावकर करत आहेत.