एका महिलेने युवतीला तब्बल अडीच लाखांना गंडा घातल्याचा प्रकार उघडकीस आला आहे. हा प्रकार वास्को बायणा येथे घडला असून या प्रकरणी युवतीने वास्को पोलिसांत तक्रार दाखल केली. सदर महिलेने वास्कोतील बऱ्याच लोकांना लाखो रुपयांना फसवले असण्याचा संशय पोलिसांनी व्यक्त केला आहे.

कार विकण्याच्या बहाण्याने फिर्यादीची 2 लाख 45 हजार 700 रुपयांची फसवणूक करणाऱ्या उमा पाटील यांच्याविरुद्ध गुन्हा दाखल केला आहे.

मायमोळे येथील संजना सुभाष मांद्रेकर यांनी दिलेल्या तक्रारीनुसार, उमा पाटीलने 2015 साली कार विकत देऊ, असे सांगून मांद्रेकर यांच्याकडून 2,45,700 रुपये घेतले होते. मात्र, नंतर मांद्रेकर यांना कार आणि पैसेही न मिळाल्याने त्यांनी विचारणा केली असता, उमा पाटीलने त्यांना 'गंभीर परिणाम भोगावे लागतील' अशी धमकी दिली आणि पैसे परत देण्यास नकार दिला.

सदर तक्रारीनुसार वास्को पोलिसांनी उमा पाटील हिचाविरुध्द फसवणुकीचा गुन्हा नोंद केला आहे. सदर महिलेने वास्कोतील बऱ्याच लोकांना लाखो रुपयांना फसवले असण्याचा संशय पोलिसांनी व्यक्त केला आहे. या प्रकरणी वास्को पोलिस उपनिरीक्षक मयूर सावंत अधिक तपास करीत आहेत.