Goa Drugs Case: गोव्यात अवैधरित्या अमली पदार्थांची तस्करीचे अनेक प्रकार उघडकीस येत असतात, आणि त्यात मुख्यत्वेकरून तरूणांचा सहभाग असल्याचे दिसून येते. तथापि, गुरूवारी गोव्याची राजधानी पणजीमध्ये मध्यवर्ती ठिकाणी पोलिसांनी अमली पदार्थांसह चक्क 71 वर्षीय महिलेला अटक केली आहे. या महिलेकडून सुमारे 80 हजार रूपयांचे अमली पदार्थ जप्त केले आहेत.

पणजी पोलिसातील पोलिस उपनिरीक्षक संकेत पोखरे, पोलिस कॉन्स्टेबल एर्मिया बालबद्रा, परशुराम पिळणकर, नूतन गौणसांड, विकास नाईक यांच्या पथकाने ही कारवाई केली. या पथकाला अमली पदार्थांबाबत माहिती मिळाली होती. त्यानंतर पथकाने पणजीतील काम्पाल या भागात गुरूवारी दुपारी साडे तीन ते पाच या वेळेत धाड टाकली.

यावेळी मालन दगडू काळे (वय 71, रा. राम मंदिराजवळ, बेली, बार्देश, गोवा) या महिलेला पोलिसांनी गांजासह रंगेहाथ ताब्यात घेतले. ती मूळची इलालुभाई कम्पाऊंड बिल्डिंग नंबर 13, रूम नंबर 503, अन्नामलाई सहकारी हौसिंग सोसायटी, शिवाजी नगर, मुंबई येथील आहे. तिच्याकडून 824.7 ग्रॅम गांजा जप्त करण्यात आला आहे. त्याची आंतरराष्ट्रीय बाजारातील एकूण किंमत सुमारे 80 हजार रूपये होते. या महिलेविरोधात एनडीपीएस अॅक्टनुसार गुन्हा नोंद करण्यात आला आहे.