Calangute Dengue Cases: कळंगुट पंचायतीने एक सप्टेंबरपासून पंचायत सभागृहात मोफत डेंग्यू चाचणी उपक्रम सुरू केला होता. त्यानंतरपासून येथे 94 रुग्णांची डेंग्यूची चाचणी पॉझिटिव्ह आली आहे. एकाच महिन्यातील हा आकडा असून डेंग्यु बाधितांच्या वाढत्या संख्येने कळंगुट किनारपट्टी भागात डेंग्युने दहशत निर्माण केली आहे.

दरम्यान, गणेशोत्सवामुळे तात्पुरती थांबलेली मोफत चाचणी सोमवारपासून पुन्हा सुरू होईल, असे कळंगुटचे सरपंच जोसेफ सिक्वेरा यांनी सांगितले.

सिक्वेरा म्हणाले की, “डेंग्यू चाचणी केलेल्या 397 व्यक्तींपैकी 94 जण पॉझिटिव्ह आढळले. गावात अचानक डेंग्यूचे रुग्ण वाढल्याने आम्ही चाचणी युद्धपातळीवर घेण्याचे ठरवले. आम्ही पॉझिटिव्ह रुग्णांना मोफत औषधे देखील देत आहोत.

खोब्रावाड्डो आणि नायकवाड्डो येथे प्रत्येकी 19 पॉझिटिव्ह प्रकरणे आढळून आली असून त्यानंतर गौरववाड्डो (पश्चिम) येथे 11 आणि उमटवाड्डो 10 रूग्ण आढळून आले आहेत. पंचायतीने चाचण्या घेत असलेल्या सर्व रुग्णांचा डेटा राखून ठेवला आहे.

आम्ही डेटा कोणाशीही शेअर केलेला नाही किंवा आरोग्य अधिकार्‍यांनी आम्हाला डेटा मागितला नाही, असेही सरपंच सिक्वेरा यांनी सांगितले.

डेंग्यूचे विषाणू नष्ट करण्यासाठी पंचायतीने डेंग्यू-प्रतिबंधात्मक उपाययोजनाही हाती घेतल्या आहेत. डेंग्यू नियंत्रणासाठी एक लाख रुपयांची कीटकनाशके खरेदी केली असून, सर्व वॉर्डांमध्ये फवारणी केली जात आहे.