वाळपई: सत्तरी तालुक्यातील बारा पंचायतींसाठी एकूण 90.69 टक्के मतदान तर 94 प्रभागांतून 276 उमेदवारांचे भवितव्य मतदानपेटीत बंद झाले. एकूण 83 मतदानकेंद्रांवर शांततेत व सुरळीत मतदान पार पडले. आता लक्ष शुक्रवारी होणाऱ्या मतमोजणीकडे लागले आहे. सकाळी 8 वाजता सुरू झालेल्‍या मतदानाला हळूहळू चांगला प्रतिसाद मिळत गेला. कोपार्डे-सत्तरी येथील सर्वांत वृद्ध महिला द्रौपदी सगुण सावंत यांनीही मतदान केले.

(90.69 percent polling in sattari for goa panchayat election)

दुपारी बारा वाजेपर्यंत 50 टक्के मतदान झाले होते. पावसाने विश्रांती घेतल्‍याने मतदारांचा उत्‍साह दिसून आला. संध्याकाळच्या सत्रात मतदारांनी चांगला प्रतिसाद दिल्यामुळे मतदान 90.69 टक्‍क्‍यांवर पोचले, अशी माहिती निवडणूक अधिकारी कौशिक देसाई यांनी दिली.

अन्‌ पैकुळवासीयांनी केले मतदान

पैकुळ-सत्तरी पूल पावसामुळे वाहून गेल्‍यानंतर तेथील बंधाऱ्यावर साकव बांधून नागरिकांची तात्‍पुरती सोय करण्‍यात आली होती. त्‍यामुळे तेथील ग्रामस्‍थांनी मतदानावर बहिष्कार घालण्‍याचे ठरविले होते. पण गावात यंदा प्रथमच मतदारकेंद्र उभारल्यानंतर पैकुळ गावातील नागरिकांनी मतदान केले. याबाबत तेथील उमेदवार संतोषी नाईक म्हणाल्या की, यंदा गावात मतदानकेंद्र सुरू केल्यानंतर गावातील नागरिकांची चांगली सोय झाली.