मडगाव: गोवा पोलिस दलातील उपअधीक्षक पदावरील अधिकाऱ्यांच्या कमतरतेकडे गोवा फॉरवर्ड पक्षाचे प्रमुख विजय सरदेसाई यांनी सरकारचे लक्ष वेधले आहे. यासंदर्भात त्यांनी मुख्य सचिवांना पत्र लिहून उपअधीक्षकांची ५८ पदे रिक्त असल्याचे निदर्शनास आणून दिले आहे.

या मनुष्यबळाच्या कमतरतेचा राज्यातील कायदा व सुव्यवस्था तसेच पोलिस प्रशासनाच्या कार्यक्षमतेवर गंभीर परिणाम होत असल्याचा इशारा सरदेसाई यांनी दिला आहे. गोवा पोलिस दलातील सध्याची आकडेवारी मांडताना त्यांनी सांगितले की, उपअधीक्षकांची एकूण ७० पदे मंजूर असून त्यापैकी केवळ १३ पदे भरलेली आहेत.

तब्बल ५८ पदे रिक्त असल्याने पोलिस खात्याची पर्यवेक्षकीय रचना मोठ्या दबावाखाली आली आहे. पदोन्नतीसाठी पात्र असलेल्या पोलिस निरीक्षकांच्या पदोन्नतीची प्रक्रिया रखडल्याने ही परिस्थिती निर्माण झाल्याचे सरदेसाई यांनी म्हटले आहे.