राज्यात गेल्या काही दिवसांपासून सातत्याने फसवणूकीच्या घटना समोर येतायेत. यातच आता क्रेडिट कार्ड नूतनीकरणाच्या बहाण्याने फसवणूक केल्याची घटना समोर आली आहे. नामदेव बामनवडकर यांची तब्बल 4.10 लाखांची फसवणूक करण्यात आली. कोलवा पोलिसांकडून याप्रकरणी गुन्हा नोंदवून तपास सुरु केला आहे.

दरम्यान, बामनवडकर यांनी फसवणूकीची तक्रार कोलवा पोलिस ठाण्यात नोंदवली होती. 31 जानेवारी रोजी वार्का येथे सव्वानऊ वाजण्याच्या सुमारास अनोळखी व्यक्तीने कार्डचे नूतनीकरण करायचे असल्याचे सांगितले. त्याने संगणकाचा वापर करत 4 लाख 10 हजारांची रक्कम केपे येथील स्टेट बॅंक ऑफ इंडियाच्या (State Bank of India) खात्यात वळवली. याप्रकरणी कोलवा पोलिसांकडून तक्रारीनुसार आर्थिक फसवणूक केल्याप्रकरणी गुन्ह्याची नोंद केली आहे.

5.7 कोटींचा गंडा घालणाऱ्या व्यक्तीला अटक

काही दिवसांपूर्वीच गोमंतकीयांना तब्बल 5.7 कोटींचा गंडा घालून गेल्या एका वर्षापासून फरार असणाऱ्या आरोपींच्या मुसक्या आवळण्यात पोलिसांना यश आल्या. सोन्याच्या व्यापारातून फायदेशीर परतावा आणि कमी दरात सोने देण्याचे आश्वासन पकडण्यात आलेल्या आरोपींनी दिले होते. गोवा पोलिसांच्या (Goa Police) गुन्हे शाखेने ही मोठी कारवाई केली. गेल्या वर्षापासून हे दोघेही आरोपी फरार होते. मात्र अखेर त्यांना अटक करण्यात आली. एप्रिल 2023 पासून पोलिस त्या दोघांच्या शोधात पोलिस होते. हे दोघेही आरोपी मुंबईचे रहिवाशी होते.

गोमंतकीयांची फसवणूक केलेल्या आरोपींची नावे अनुक्रमे अक्षय सावंत आणि पल्लवी घाडगे अशी आहेत. त्यांनी सोन्याच्या व्यापारातून चांगला परतावा देण्याचे आश्वासन देऊन गोमंतकीयांची फसवणूक केली होती. त्यांनी गोव्यातील सर्वसामान्य जनतेला आपल्या जाळ्यात अडकवले होते. कमी दरात सोने उपलब्ध करुन देऊ असे आरोपींनी त्यांना सांगितले होते.