37th National Games Goa 2023 Mashaal Launching: गोव्यात ऑक्टोबर-नोव्हेंबरमध्ये होणाऱ्या 37 व्या राष्ट्रीय क्रीडा स्पर्धेचा मशाल प्रज्वलन कार्यक्रम आज राजभवन दरबार हॉल येथे पार पडला. राज्यपाल पी. एस. श्रीधरन पिल्लई यांच्या हस्ते मशाल प्रज्वलन करण्यात आले. गोव्याची आंतरराष्ट्रीय सेलर कात्या कुएल्हो हिच्या हातून मशाल राज्यपालांच्या हाती देण्यात आली.

यावेळी राज्याचे मुख्यमंत्राी प्रमोद सावंत, क्रीडामंत्री गोविंद गावडे, केंद्रीयमंत्री खासदार श्रीपाद नाईक आणि इतर मान्यवर उपस्थित होते.

गोवा ऑलिंपिक असोसिएशनच्या झेंड्याखाली विविध खेळांच्या राज्य संघटनांनी तीव्र निषेध नोंदविताना शुक्रवारी होणाऱ्या स्पर्धा मशाल प्रज्वलन कार्यक्रमावर बहिष्कार टाकण्याचा निर्णय घेतला होता. दरम्यान, मुख्यमंत्री डॉ. सावंत यांनी कार्यक्रमावर बहिष्कार टाकू नये असे आवाहन केल्यानंतर संघटनांनी बहिष्कार मागे घेतला.

खेळाडूंसाठी प्रशिक्षण-सराव शिबिरे, क्रीडा उपकरणे खरेदीसाठी विविध संघटनांना निधी उपलब्ध करून देण्याचे आश्वासन देऊनही अजून ते पाळलेले नाही.

खेळाडूंसाठी राज्य सरकारने अजून निधी पुरवलेला नाही. त्यामुळे निवासी शिबिर सुरू करणे अशक्य असल्याचे या संघटनांच्या पदाधिकाऱ्यांनी स्पष्ट केल्याची माहिती जीओए सचिव गुरुदत्त भक्ता यांनी दिली. त्यामुळे मशाल कार्यक्रमावर बहिष्कार घालण्याचा निर्णय गोवा ऑलिम्पिक संघटनेने घेतला होता.

दरम्यान, क्रीडा संघटनांना निधी देण्याची घोषणा मुख्यमंत्री प्रमोद सावंत यांनी केल्यानंतर संघटनांनी मशाल अनावरण कार्यक्रमावरील बहिष्कार मागे घेतला.