Sanguem IIT: गोव्यातील सांगे तालुक्यात प्रस्तावित असलेल्या आयआयटीसाठी तीन जागांचा विचार केला जात आहे. आयआयटीच्या कायमस्वरूपी कॅम्पससाठी गोवा सरकारने सांगेतील शेतकऱ्यांच्या विरोधानंतर सांगेतच तीन नव्या जागा शोधल्या आहेत.

केंद्रीय मनुष्यबळ विकास मंत्रालयाला या नवीन जागांबाबत आधीच राज्य सरकारने लेखी कळवले आहे. या तिन्ही भुखंडाची स्थळ निवड समितीकडून पाहणी आणि निरीक्षण याबाबत या सुचनेवर 15 दिवसांत प्रतिसाद अपेक्षित आहे, अशी माहिती समाजकल्याण खात्‍याचे मंत्री तथा सांगे मतदारसंघाचे आमदार सुभाष फळदेसाई यांनी टाईम्स ऑफ इंडिया या वृत्तपत्राला दिली आहे.

गोव्यातील इतर ठिकाणी स्थानिकांच्या विरोधामुळे हा प्रकल्प तिथे होऊ शकलेला नाही. मुख्यमंत्री डॉ. प्रमोद सावंत आणि फळदेसाई यांना हा प्रकल्प सांगेतच हवा आहे. गतवेळी केंद्रीय मंत्रालयाने जमीन अपुरी असल्याचे सांगत स्थळ निवड समितीला पाहणी करण्यासाठी भेट देणे योग्य नाही, असे सांगितले होते.

“सांगे येथे आयआयटीमुळे या भागाच्या विकासाला चालना मिळेल. पूर्वीची जागा देखील या नव्या तीन सूचनांचा भाग आहे. ही जागा अपुरी आढळून आली कारण 7 लाख चौरस मीटर जमिनीपैकी 4 लाख चौरस मीटर हा डोंगराळ भाग होता.

आता आम्ही या जागेवर प्रकल्प व्यवहार्य करण्यासाठी लगतची अतिरिक्त जमीन विचारात घेतली आहे, असेही फळदेसाई यांनी सांगितले.

सांगे येथील पूर्वीची जागा सरकारने शॉर्टलिस्ट केली होती कारण जमीन आधीच राज्याच्या ताब्यात होती आणि खाजगी जमीन मालकांनी शेवटच्या क्षणी नकार दिला तरी फरक पडणार नव्हता. सूत्रांच्या माहितीनुसार नव्या जागांमध्ये मात्र खासगी जमीनींचाही समावेश आहे.