Goa Hill Cutting

मडगाव: दक्षिण गोव्यात १ जानेवारी ते १५ ऑगस्ट या कालावधीत २९ डोंगर कापणी आणि २१ मातीचा भराव घालून जमीन बुजवण्याचे प्रकार मिळून ५० जणांवर प्रशासनाने कारवाई केली आहे. याप्रकरणी दक्षिण गोवा भरारी पथकाने पाहणी करून संबंधितांना काम बंद आणि कारणे दाखवा नोटीस बजावली आहे. यात सर्वाधिक सासष्टी तालुक्यात २० जणांवर कारवाई करण्यात आली. याशिवाय ३५ अज्ञातांविरोधात तक्रारी आल्या आहेत.

राज्य सरकारने राज्यात कुठेही डोंगरकापणी सुरू असली तरी त्याबाबतची माहिती जिल्हाधिकाऱ्यांना देण्याची जबाबदारी तलाठ्यांवर सोपवली आहे. राज्य आपत्कालीन यंत्रणेच्या काही दिवसांपूर्वी झालेल्या बैठकीनंतर मुख्यमंत्री डॉ. प्रमोद सावंत यांनी स्वतःच तशी घोषणा केली होती.

दरम्यान, १ जानेवारी ते १५ ऑगस्ट या कालावधीत दक्षिण गोव्यात २९ डोंगर कापणी आणि २१ मातीचा भराव टाकून जमीन बुजवण्यात आल्याचे समोर आले आहे. याप्रकरणी उपजिल्हाधिकारी व्हेल्टन टेलीस यांनी आदेश जारी करून संबंधितांना नोटीस बजावली आहे. याच कालावधीत ३५ प्रकारांत उल्लंघन करणाऱ्यांची माहिती मिळाली नाही. वरील कालावधीत सासष्टी तालुक्यात सर्वाधिक २० जणांवर कारवाई केली आहे. त्यानंतर केपे ११, फोंडा ७, काणकोण ४, तर धारबांदोडा आणि मुरगाव तालुक्यात प्रत्येकी ३ आणि सांगे तालुक्यात दोघांवर कारवाई केली आहे.