Dharbandoda Accident

फोंडा: भूमिकानगर-तिस्क येथील २८ वर्षीय युवकाने हल्लीच दुचाकी विकत घेतली होती. याच दुचाकीवरून वाढदिवसाची पार्टी करून सकाळी घरी परतताना झालेल्या अपघातात त्याचा दुर्दैवी अंत झाला, तर त्या दुचाकीवर मागे बसलेला युवक जखमी झाला.

धारबांदोडा संजीवनी कारखान्यासमोरील राष्ट्रीय महामार्गावर गुरुवारी (ता. १६) पहाटे ४ ते ५ च्यादरम्यान अज्ञात वाहनाची धडक बसून भूमिकानगर-तिस्क उसगाव येथील दुचाकीचालक महंमद रफी हुसेन बाशा मोमीन (वय २८ वर्षे, मूळ कर्नाटक) याचा जागीच मृत्यू झाला, तर दुचाकीवर मागे बसलेला रोहित निकोलस कुजर (वय २० वर्षे, सध्या रा. भूमिकानगर, मूळ झारखंड) या जखमी युवकावर गोमेकॉत उपचार सुरू आहेत. दुचाकीला धडक देऊन पसार झालेल्या अज्ञात वाहनचालकाचा फोंडा (Ponda) पोलिस शोध घेत आहेत.

बुधवारी रात्री मित्राच्या वाढदिवसानिमित्त आयोजिलेल्या पार्टीला हजर राहण्यासाठी महंमद आणि रोहित हे दोघेही जीए-०३-एबी-७०५१ या क्रमांकाची दुचाकी घेऊन मोले येथे गेले होते. सकाळी परतताना विरुद्ध दिशेने येणाऱ्या अज्ञात वाहनाची धडक बसून हा अपघात (Accident) झाला. यात महंमदचा जागीच मृत्यू झाला. महंमद हा उसगावातील नेस्ले कंपनीत कंत्राट पद्धतीवर काम करीत होता. बुधवारी रात्री तो मित्राच्या वाढदिवसाला गेला होता. त्याच्या पश्चात पत्नी आणि दोन महिन्यांचा मुलगा आहे.

दुचाकीची धडक : कामगार जखमी

खुरसाकडे-उसगाव येथे रस्त्यावर हॉटमिक्स डांबरीकरणाचे काम करताना दुचाकीची धडक बसल्याने मारुती अशोक नेर्लेकर हा कामगार जखमी झाला. या अपघातात दुचाकीस्वारही जखमी झाला. जखमींना अधिक उपचारासाठी गोमेकॉत दाखल केले आहे.