Manipur Youth Death In Goa: कांदोळी येथून एक धक्कादायक घटना समोर आली आहे. येथे एका 28 वर्षीय मणिपुरी तरुणाचा संशयास्पद परिस्थितीत मृत्यू झाला. शुक्रवारी (10 ऑक्टोबर) दुपारी 3 वाजून 19 मिनिटांनी कांदोळी प्राथमिक आरोग्य केंद्राच्या वैद्यकीय अधिकाऱ्यांकडून पोलिसांना फोन आला, त्यानंतर ही घटना उघडकीस आली.

मृतदेहाची ओळख आणि प्राथमिक माहिती

दरम्यान, माहिती मिळताच पोलिसांना घटनास्थळी धाव घेऊन तात्काळ तपास सुरु केला. मयत तरुणाचे नाव मोहम्मद वास्तम खान (Md. Wastam Khan) (वय 28) असे आहे. तो मूळचा मणिपूरमधील थौबल (Thoubal, Manipur) जिल्ह्यातील रहिवासी होता. त्याच्या वडीलाचे नाव मोहम्मद सुलेमान आहे. मोहम्मदला मृत अवस्थेतच रुग्णालयात (Hospital) आणण्यात आले होते, अशी माहिती आरोग्य केंद्राने पोलिसांना दिली.

बेशुद्धावस्थेत सापडला

घटनेची माहिती मिळाल्यानंतर कांदोळी (Candolim) पोलिसांनी वास्तम खानच्या सोबत असलेल्या मित्राची चौकशी केली. या चौकशीतून काही महत्त्वाची माहिती समोर आली. मृतकाला दीर्घकाळ दारुचे व्यसन (Chronic Alcoholic) होते. कांदोळी येथील त्याच्या भाड्याच्या खोलीत तो बेशुद्धावस्थेत आढळला. त्याच्या मित्रांनी त्याला त्वरित रुग्णालयात नेले, मात्र डॉक्टरांनी त्याला मृत घोषित केले.

पोलिसांची पुढील कारवाई

कांदोळी पोलिसांनी या घटनेचा पंचनामा पूर्ण केला. सध्या या प्रकरणाची पुढील चौकशी पोलीस उपनिरीक्षक (PSI) स्नेहल मलिक यांच्यामार्फत सुरु आहे. तरुणाच्या मृत्यूमागे नेमके कोणते कारण आहे, हे पोस्टमार्टम (Post Mortem) रिपोर्ट आल्यानंतरच स्पष्ट होईल, अशी माहिती पोलिसांनी दिली. पोस्टमार्टम रिपोर्टनंतर मृत्यूचे नेमके कारण समोर येईल, त्यानुसार पुढील कायदेशीर कारवाई केली जाईल.