Anmod Checkpost : गोवा राज्यातून अवैधरित्या परराज्यात दारु वाहतुकीवर बंदी आहे. परंतु बंदी असतानाही दारु वाहतूक होत असल्याची अनेक प्रकरणे समोर येत आहेत. दारु वाहतूक करताना आरोपींकडून वेगवेगळ्या पध्दतींचा वापर केला जातो. अशातच गोवा राज्यातून कर्नाटकात अवैधरित्या दारुसाठा घेऊन जाणाऱ्या एकाला पोलिसांनी ताब्यात घेतले आहे. या कारवाईत संशयिताकडून 207 लीटर गोवा बनावटीची दारु व वाहन असे मिळून सुमारे 7 लाख रुपयांचा माल जप्त करण्यात आला आहे. ही कारवाईत अनमोड अबकारी विभागाकडून करण्यात आली.

मिळालेल्या माहितीनुसार, आज रविवारी चालक सय्यद अमीर जान हा बोलेरो पिकपमधून गोवा बनावटीचा 207 लीटर दारुसाठा घेऊन जात होता. यावेळी तो अनमोड तपासणी नाक्यावर आला असता अबकारी विभागाकडून त्याला तपासणीसाठी थांबवण्यात आले. यावेळी वाहनाची तपासणी केली असता वाहनामध्ये दारुसाठा आढळून आला. याप्रकरणी अबकारी खात्याने चालक संशयित सय्यद अमीर जान (बंगळूरु) याला अटक केली आहे. अटक करण्यात आलेला संशयित गोव्यातून कर्नाटकात मासे वाहतूक करत होता. याबाबत अधिक तपास सुरु आहे.

अनमोड येथील अबकारी चेकपोस्टवर काही दिवसांपूर्वी एका ट्रकमध्ये दारु साठा जप्त करण्यात आला होता. या कारवाईत 13 लाखांहून अधिक किंमतीचा दारुसाठा जप्त करण्यात आला होता. तपासणी दरम्यान ट्रकमध्ये विविध ब्रॅंड्सची गोवा बनावटीची 57 लीटर दारु आढळून आली.