थिवी येथील एका चाईल्ड केअर होममधून अपहरण झालेल्या दोन अल्पवयीन मुलींची पोलिसांनी सुखरूप सुटका केली. कोणतेही धागेदोरे नसलेल्या या प्रकरणाचा अवघ्या १२ तासांत उलगडा केल्याने कोलवाळ पोलिसांच्या कामगिरीचे कौतुक केले जात आहे.

माडेल-थिवी येथील एका चाईल्ड केअर होममधील १३ आणि १४ वर्षीय दोन अल्पवयीन मुलींचे अपहरण झाल्याची तक्रार कोलवाळ पोलिस स्थानकात नोंदविली होती. या शोध मोहिमेत उपअधीक्षक संदेश चोडणकर, निरीक्षक विजय राणे, उपनिरीक्षक भारत खरात, यशिका सांकवाळकर, निखिल नाईक, प्रवीण पाटील आणि स्वनिका बुडे यांनी महत्त्वपूर्ण कामगिरी केली.

म्हापशातून पीडित मुलींना घेतले ताब्यात

याप्रकरणी पोलिसांनी भान्यासं कलम १३७(१) तसेच गोवा बाल कायद्याच्या कलम ८ अन्वये शुक्रवारी गुन्हा नोंदवून तपास चक्रे गतिमान केली. यावेळी विविध पोलिसांची पथके तयार करून अपहृत मुलींचा शोध घेण्यास सुरवात केली. खात्रीशीर माहिती मिळाल्यानंतर पोलिसांनी या मुलींची म्हापशातून सुटका केली.