पणजी: डिस्ट्रिक्ट मिनरल फाऊंडेशन आणि मॉल्बियो डायग्नोस्टिक्स यांच्या सीएसआर उपक्रमातून प्रदान केलेल्या १९ रुग्णवाहिका आणि दोन शववाहिकांचे लोकार्पण शुक्रवारी गोवा आरोग्य संचालनालयाच्या आवारात मंत्री राणे यांच्या हस्ते करण्यात आले.

यावेळी आरोग्य मंत्री विश्‍वजीत राणे म्हणाले, जिल्हाधिकाऱ्यांनी जिल्हा मिनरल निधीतून या रुग्णवाहिका उपलब्ध करून दिल्या आहेत. आमदार राजेश फळदेसाई यांनी केलेल्या विनंतीनुसार दिवाडी येथे नवी रुग्णवाहिका उपलब्ध करण्याचे आश्वासन दिले आहे. १८ वर्षांपूर्वी ही रुग्णवाहिका सेवा सुरू केली होती.

राज्यातील जनतेच्या आरोग्याच्या दृष्टीने ते पाऊल उचलले होते. आता ही सेवा जीवनरेखा बनली आहे. मुख्यमंत्र्यांच्या नेतृत्वाखाली भाजप सरकारच्या माध्यमातून सर्व जनतेच्या दारात आरोग्यसेवा पोहोचली जावी, यासाठी काम केले जात आहे. मोल्बिया डायग्नोस्टिकने शववाहिका उपलब्ध करून दिल्या आहेत, गरीब लोकांसाठी ही मोफत सेवा आहे. ती कधीच बंद होणार नाही.

ते पुढे म्हणाले, १०८ ही देशात सर्वाधिक सर्वोत्तम प्रतिसाद मिळणारी सेवा आहे. पाच कार्डियाक रुग्णवाहिका मिळाल्याने त्यांचा राज्याला फायदा होणार आहे. गोमेकॉतील केअर टेकर्स सेवा बंद करणार नाही. कारण अनेक कुटुंबांनी माझ्याकडे याविषयी विनंती केली. त्यासाठी डेटाबेस सुविधा आणली जाणार असल्याचे राणे यांनी स्पष्ट केले.

‘मॉल्बियो’कडून दर्जेदार आरोग्य सेवा

मॉल्बियो ही कंपनी प्रगत पोर्टेबल प्लॅटफॉर्मद्वारे दर्जेदार आरोग्यसेवा पुरविण्यात आघाडीवर आहे. या कंपनीने संसर्गजन्य रोग व्यवस्थापनासाठी देशात प्राथमिक आरोग्य पायाभूत सुविधा उपलब्ध करून दिल्या आहेत. जगभरातील दुर्गम, संसाधन-मर्यादित भौगोलिक क्षेत्रांना टीबी आणि हिपॅटायटीस यासारख्या संसर्गजन्य रोगांपासून ते असंसर्गजन्य रोग जसे की स्तनाचा कर्करोग, गर्भाशयाच्या ग्रीवेचा कर्करोग, सिकलसेल रोग आणि बरेच काही यासाठी अत्याधुनिक निदान करण्यासाठी ‘मॉल्बियो’चा उपयोग होतो.