Goa Cashew Rates

मडगाव, गोव्यातील काजूला रु. 175 प्रति किलो आधारभूत किंमत द्यावी, ही माझी गेल्या दोन वर्षांपासूनची मागणी आहे. आता लोकसभा निवडणुकीवर डोळा ठेवून कृषी विभागाने काजूला रु.170 रुपये आधारभूत किंमत देण्याचा प्रस्ताव पुढे केल्याचे समजते.

मुख्यमंत्री डॉ. प्रमोद सावंत यांनी ताबडतोब 175 प्रति किलो दराची अधिसूचना जारी करावी, आणि त्याचे श्रेय केवळ काँग्रेस पक्षाला द्यावे, अशी मागणी केपेचे आमदार एल्टन डिकॉस्टा यांनी केली आहे.

कृषी विभागाने काजूला 170 रुपये आधारभूत किंमत देण्याच्या प्रस्तावावर प्रतिक्रिया देताना एल्टन डिकॉस्टा यांनी, निवडणुकीत फायदा घेण्यासाठी शेतकऱ्यांना आमिष दाखविण्याचा भाजपचा हा ‘निवडणूक जुमला’ आहे असा आरोप केला आहे.

सरकारला हिंमत असेल तर त्वरित अधिसूचना जारी करावी. परंतु, माझ्या आणि काँग्रेस पक्षाच्या सातत्यपूर्ण पाठपुराव्यामुळेच भाजप सरकारला आधारभूत किंमत वाढवणे भाग पडले हे सत्य आहे, असा दावा एल्टन डिकॉस्टा यांनी केला आहे.

काही दिवसांपूर्वी मी एका वृत्त वाहिनीला दिलेल्या मुलाखतीत काजू उत्पादकांची दुर्दशा दाखवली होती. लोकांनी त्या व्हिडिओत मागणी नसल्यामुळे काजूबियांसह फळ कसे सडण्यासाठी सोडले जाते, हे पाहिले होते. शेतकरी रडताना सरकार कार्यक्रमांत व्यग्र होते, टोला त्यांनी हाणला.

सरकारचे जुमले बाजीच्या कलेवर प्रभुत्व !

राज्यातील भाजप सरकारने जुमले बाजीच्या कलेवर प्रभुत्व मिळवले आहे. मोठमोठ्या घोषणा करायच्या पण अंमलबजावणी मात्र होत नाही. अर्थसंकल्पाच्या अंमलबजावणीत 35 टक्के उत्तीर्ण होण्यातही हे सरकार अपयशी ठरले आहे, असे एल्टन डिकॉस्टा यांनी नमूद केले.

मी शेतकऱ्यांना आवाहन करतो की, जोपर्यंत 175 रुपये प्रति किलो आधारभूत किंमत असलेली अधिसूचना जाहीर होत नाही, आणि वास्तविक पैसे शेतकऱ्यांच्या खात्यात जमा होत नाहीत, तोपर्यंत या सरकारवर विश्वास ठेवू नका, असेही ते म्हणाले.