मडगाव/पणजी : गोव्याच्या सागरी हद्दीत बेकायदेशीर मासेमारी करणाऱ्या कर्नाटक, महाराष्ट्रातील ट्रॉलर्सविरोधात बाणावली किनाऱ्याजवळ मोठी कारवाई करण्यात आली. स्थानिक मच्छीमारांच्या मदतीने सागरी पोलिस व मत्स्योद्योग खात्याने एकूण १३ ट्रॉलर जप्त केले. मत्स्योद्योग संचालक डॉ. शमिला मोंतेरो यांनी ही माहिती दिली.

अलीकडच्या काळात एकाच वेळी इतक्या मोठ्या संख्येने ट्रॉलर्स पकडण्याची ही पहिलीच घटना आहे. या कारवाईवेळी तातडीने स्थानिक मच्छीमारांची मदत घेण्यात आली.

गोव्याच्या सागरी हद्दीत बेकायदा प्रवेश करणाऱ्या ट्रॉलर्सवर कठोर कारवाई करण्याचे निर्देश मुख्यमंत्री डॉ. प्रमोद सावंत यांनी यापूर्वीच दिले आहेत. नियमांचे उल्लंघन करणाऱ्यांना १० लाख रुपयांपर्यंत दंड आकारण्याचे आश्वासनही देण्‍यात आले आहे. त्‍यानुसार आता या ट्रॉलर्सवर कारवाई झाली पाहिजे. - पेले फर्नांडिस, मच्‍छीमार (बाणावली)