Virat Kohli Record: भारतीय क्रिकेटचा सुपरस्टार आणि आधुनिक क्रिकेटचा महान फलंदाज विराट कोहली सध्या आपल्या कारकिर्दीतील सुवर्णकाळातून जात असल्याचे पाहायला मिळत आहे. मैदानात उतरताच विक्रमांचे इमले रचणाऱ्या कोहलीने आता राजकोटच्या मैदानावर एक असा पराक्रम केला, ज्याची प्रतीक्षा भारतीय क्रिकेट जगताला गेल्या 17 वर्षांपासून होती.

न्यूझीलंडविरुद्धच्या दुसऱ्या एकदिवसीय सामन्यात फलंदाजीला आल्यानंतर काही धावा करताच विराटने 'क्रिकेटचा देव' मानल्या जाणाऱ्या सचिन तेंडुलकरला एका खास बाबतीत मागे टाकले. आता विराट कोहली न्यूझीलंडविरुद्ध एकदिवसीय क्रिकेटमध्ये सर्वाधिक धावा करणारा भारतीय फलंदाज ठरला असून त्याने सचिनचा अनेक वर्षांपासून अबाधित असलेला विक्रम मोडीत काढला आहे.

या विक्रमाची नांदी मालिकेतील पहिल्याच सामन्यात लागली होती. न्यूझीलंडविरुद्धच्या पहिल्या एकदिवसीय सामन्यात विराटने अत्यंत आक्रमक आणि जबरदस्त फॉर्मचे दर्शन घडवत 93 धावांची खेळी खेळली होती. अवघ्या 7 धावांनी त्याचे शतक हुकले असले तरी त्या खेळीने त्याने सचिनच्या विक्रमाच्या अगदी जवळ मजल मारली होती. पहिल्या सामन्यात जे काम अपूर्ण राहिले होते, ते कोहलीने राजकोटच्या मैदानावर पूर्ण केले.

राजकोटची फलंदाजीला पोषक असलेली खेळपट्टी आणि विराटचा सध्याचा फॉर्म यामुळे त्याने डावाच्या सुरुवातीलाच आवश्यक धावा जमवून सचिन तेंडुलकरला पिछाडीवर टाकले. सचिन तेंडुलकरने आपल्या प्रदीर्घ कारकिर्दीत न्यूझीलंडविरुद्ध 42 सामने खेळून 1750 धावांचा डोंगर उभा केला होता. विराटने केवळ 35 सामन्यांमध्येच 1760 हून अधिक धावा कुटून सचिनला मागे सारले. 17 वर्षांपूर्वी सचिनने हा टप्पा गाठला होता, त्यानंतर कोणत्याही भारतीय फलंदाजाला या विक्रमापर्यंत पोहोचता आले नव्हते, जे आज विराटने करुन दाखवले.

भारतीय स्तरावर विराट जरी आता अव्वल स्थानी पोहोचला असला, तरी जागतिक स्तरावर त्याला अजून एका दिग्गज खेळाडूचे आव्हान पार करायचे आहे. न्यूझीलंडविरुद्ध एकदिवसीय क्रिकेटमध्ये सर्वाधिक धावा करण्याचा विश्वविक्रम अजूनही ऑस्ट्रेलियाच्या रिकी पाँटिंगच्या नावावर आहे. पाँटिंगने किवी संघाविरुद्ध 51 सामन्यांमध्ये 1971 धावा केल्या आहेत, ज्यात 6 शतके आणि 12 अर्धशतकांचा समावेश आहे. कोहलीच्या नावावर सध्या न्यूझीलंडविरुद्ध 6 शतके आणि 10 अर्धशतके आहेत. ज्या वेगाने आणि सरासरीने विराट धावा करत आहे, ते पाहता आगामी काळात तो रिकी पाँटिंगचा 1971 धावांचा जागतिक विक्रमही मोडण्याची दाट शक्यता निर्माण झाली आहे.

विराट कोहलीच्या (Virat Kohli) या सातत्यपूर्ण कामगिरीने त्याने टीकाकारांची तोंडे तर बंद केलीच आहेत, पण त्याचबरोबर 2026 या वर्षात भारतीय क्रिकेटसाठी मोठी आशाही निर्माण केली आहे. गेल्या पाच सामन्यांपासून विराटने प्रत्येक डावात किमान 50 धावांची धावसंख्या ओलांडली आहे. राजकोटमधील या विक्रमानंतर कोहलीचा आत्मविश्वास अधिक दुणावला असून या मालिकेतील उर्वरित सामन्यांमध्ये त्याच्या बॅटमधून आणखी मोठ्या खेळी पाहायला मिळतील अशी चाहत्यांना खात्री आहे. विराटचे हे वर्चस्व केवळ आकडेवारीपुरते मर्यादित नसून, ते भारतीय क्रिकेटच्या आगामी मोठ्या स्पर्धांसाठी शुभसंकेत मानले जात आहेत.